Urugendo rwa Bob Pro wubatse izina rikomeye mu batunganya indirimbo mu Rwanda

Yanditswe na Uwiduhaye Theos
Kuya 3 Gicurasi 2019 saa 12:00
Yasuwe :
0 0

Hari igihe wumva indirimbo ukizihirwa utazi amaboko zanyuzemo n’uwazirambitseho ikiganza. Niba uzi nyinshi za Buravan, Sentore, Teta Diana, iza Dj Marnaud ugezweho muri iki gihe menya ko hari nyinshi mu zo ukunda zagizwemo uruhare rukomeye na Bob umaze kuba ikimenyabose mu bakora uyu mwuga.

-  Yize amashuri ku bugenge
-  Nta shuri yigeze ajyamo kwiga ibyo gutunganya indirimbo
-  Yigeze kujya muri Ruhago biranga

Ni umusore w’umuhanga mu gutunganya ibihangano bitandukanye ndetse umuhanzi wageze mu biganza bye, aba yinjiye mu muryango uhita umugeza ku bwamamare nta mananiza.

Ni we wazamuye abahanzi benshi twamenye barimo Buravan, Andy Bumuntu, Umutare Gaby n’abandi anakorana na Teta Diana, Cecile Kayirebwa n’abandi b’ibihangange mu Rwanda.

Ubusanzwe yitwa Bob Emmanuel yavukiye muri Uganda ahitwa Tooro. Ni umwana umwe kuri se.

Yigiye amashuri abanza muri Uganda ahitwa Kasese nyuma aza gukomereza mu Rwanda mu mashuri yisumbuye. Arangije ayisumbuye, yahise ajya kwiga gucuranga Piano mu Bubiligi.

Ni umusore utuje ariko ucecekanye ubumenyi buhambaye mu gukirigita Piano no gutunganya ibihangano. Ubu izina rye rimaze gutumbagira ku buryo abahanzi bakomeye bamutegera rutemikirere akajya kubakorera indirimbo mu mahanga.

Yakoze ku ndirimbo Meddy afitanye n’abahanzi batandukanye muri Tanzania barimo Diamond na Mbosso bose bo muri Wasafi zizajya hanze mu minsi iri imbere. Yitabajwe na Meddy nk’umwe mu nyaryenge mu gutunganya indirimbo amara iminsi muri Tanzania ari gukorera aba bahanzi.

Sinari nziko nzaba producer

Bob avuga ko yavuye muri Uganda agahita aza mu Rwanda aho yavuye akomereza mu Bubiligi akajya kwiga gucuranga piano agiye kwiga gucuranga Piano.

Ati “Mu Bubiligi ntabwo nari ngiye kwiga amashuri asanzwe byari bitewe n’ubuzima nari mbayemo butari bwiza mbona umuryango undera, nkomerezayo gutyo ariko mu bijyanye n’umuziki kuko nari nkeneye ikintu gishobora kungaburira kandi mu buryo bwihuse kubera ntari kwiga amashuri asanzwe ngo bishoboke kubera ubushobozi buke.”

Bob yabonye umuryango umurihira amashuri, ajya kwiga atyo. Hari umuhanga mu gutunganya indirimbo witwa Doncon John wafashaga Cécile Kayirebwa, niwe wamubaye hafi atangira urugendo atyo.

Yakomeje gukorana nawe agaruka mu Rwanda mu 2012. Akomeza avuga ko akiri mu Bubiligi yajyaga aza mu biruhuko mu Rwanda akajya acuranga ahantu hatandukanye muri Kigali ariko atazi ko azaba producer.

Ati “kiri mu Bubiligi najyaga nza inaha mu biruhuko, za 2006 na 2008 nkajya nsanga studio zitandukanye ariko sinari nziko nzajya ntunganya indirimbo.

Yize ku ihangi

Bob yatangiriye amashuri muri Uganda aza gusoreza ayisumbuye mu Rwanda. Ati “Mu kurangiza amashuri ariko nariyishyuriraga. Nagombaga gushakisha abantu benshi twiganye bo barabizi, bambonye bahita bavuga bati ni musore wigaga rimwe cyangwa kabiri mu gihembwe gusa naratsindaga. Nagiye mpura n’ibibazo byinshi mu myigire kubera ubuzima.”

Urugendo rwe rwa muzika avuga ko rusa n’urwatangiriye mu rusengero kimwe n’abandi bahanzi benshi kuko ariho yatangiriye kugaragaza impano ye ya muzika.

Mu 2012 bisa n’aho aribwo urugendo rwe rwa muzika rwafashe ikindi cyerekezo kuko yisunze Producer Nicolas n’undi witwaga Prince atangira atyo ibyo gutunganya indirimbo.

Yahereye ku zirimo ‘Udatsikira’ ya Jules Sentore agenda azamuka gake gake kugeza ubwo mu 2013 yatangiye gukorera muri Scratch Music Studio, abika amafaranga ndetse anamenyana n’abahanzi hanyuma muri Nzeri 2015 ahita ashinga studio ye akoresheje miliyoni esheshatu. Ubu studio ye ihagaze miliyoni 14.5.

Bob Pro muri studio ye ya The Sounds

Umuvandimwe we watumye areka ruhago

Ati “Njya gukina umupira mu ikipe yari iy’umugabo witwaga John yabaga Kicukiro, abantu benshi barayizi yanakinnyemo ba Iranzi n’abandi. Icyo gihe ngiye gukina bahita banshyira mu ikipe y’abakiri bato barankunda cyane.”

Bob ngo yari myugariro ndetse yaranahawe igitambaro cya kapiteni. Kujya mu myitozo byabaga ari hamana ariko yajya mu mukino akitwara neza n’ubwo hari igihe batamushyiragamo kubera ko akenshi yabaga yagiye gushaka ubuzima kuko babahaga amafaranga make nk’igihumbi cyangwa bibiri.

Ngo umukecuru w’aho yabaga yari umuntu udakunda umupira w’amaguru ahubwo yashakaga ko aba umucuranzi.

Arakomeza ati “Nari mfite undi musore twabanaga muri urwo rugo wakinaga karate, yigeze kujya gukina ashaka umukandara bamukura amenyo ndiyo tugeze mu rugo umukecuru ibikoresho byose twakoresha arabijugunya, duhita tuyoboka mu nsengero.”

Icyumvirizo atera umuhanzi mbere yo gukorana

Bob amaze kuzamura abahanzi batandukanye barimo Buravan, Yverry, Andy Bumuntu, Umutare Gaby n’abandi. Ubu ari gukorana n’abandi barimo Rukotana, Alyn Sano na Juda Muzik bari kuzamuka neza.

Avuga ko kugira ngo amenye ko umuhanzi afite gahunda atari ukumubonamo impano ahubwo areba uburyo yitwara, uko avuga n’ibindi byerekeye imyitwarire.

Ati “Umuntu ufite gahunda ni umuntu ufite icyerekezo, ufite ejo hazaza ari gupanga. Rero nk’umuntu iyo muganiriye hari ukuntu wumva imipango ukumva itarimo guhuzagurika kandi abo twakoranye bose mwagiye mubona ko hari icyo byatanze.”

Mu Rwanda yemera Pastor P nk’umwe mu bafite umwihariko mu byo bakora, naho ngo abandi bose bafite ibyo bahuriyeho.

Album ya Kayirebwa niyo yakoreyemo amafaranga yamuhinduriye ubuzima kuko ayo yakuyemo ariyo yaguzemo ibikoresho yatangiriyeho studio ye.

Niwe uri gukora indirimbo za Dj Marnaud ugezweho muri iki gihe

Yazamuye Buravan

Ubu ari gukorana n’umuhanzikazi Lyn uri mu bari kuzamuka

Niwe wakoze Everything ya Meddy na Uncle Austin

Yakoze Merci ya Alpha Rwirangira

Ikiganiro kirambuye na Bob Pro

Ni umuhanga wihariye mu gutunganya ibihangano kandi nta shuri yigeze abyigamo
Bob Pro yakoze ku ndirimbo Meddy yahuriyemo na Mbosso niyo yakoranye na Diamond Platnumz
Bob Pro avuga ko Pastor P ari umwe mu batunganya ibihangano mu Rwanda bafite ubuhanga bwihariye
Nta muhanzi n'umwe ukomeye mu Rwanda batarakorana
Ubuhanga bwe bwatumye Meddy amwitabaza mu ndirimbo yakoranye na Diamond Platnumz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza