Urukundo rwa Nizzo n’umukobwa wiga mu Bushinwa ruragana mu manga

Yanditswe na Munyengabe Murungi Sabin
Kuya 18 Mata 2017 saa 09:04
Yasuwe :
0 0

Nshimiyimana Muhamed [Nizzo] uririmba mu itsinda rya Urban Boyz arareba ikijisho umukobwa witwa Umulisa Yvette, iby’uburyohe bw’urukundo rwabo rwari rumaze imyaka igera kuri itanu byajemo amahari.

Mu myaka itanu bimaze bizwi ko Nizzo akundana na Yvette Umulisa babagaho mu munezero ku bwo kugendera mu munyenga w’urukundo no guteteshanya ubudasiba ariko kugeza uyu munsi ubumwe buragana aharindimuka.

Kuva mu mwaka wa 2015 Nizzo ntiyahwemaga gusakaza amafoto ya Yvette Umulisa ku mbuga nkoranyambaga akayaherekeza amagambo asize umunyu abwira iyi nkumi ko ‘urukundo rwabo rudateze kuzashira’ undi na we akikiriza abwira umusore ko ari we Imana yamuremeye.

Amagambo aryohereye kurusha ubuki babwiranaga asa n’ayashize ivuga ku bw’amahari bagiranye, ubu babwirana amagambo akeba ku rurimi kugeza ubwo byazamuye umujinya muri Nizzo asiba amafoto yose ya Yvette yari amaze imyaka itatu ashyira ku rubuga rwa Instagram.

Kugeza ubu, Nizzo yakuye kuri Instagram ifoto yose irimo isura ya Umulisa Yvette n’izindi zose zavugaga ku byerekeye urukundo rwabo. Ubajije Nizzo impamvu yafashe uyu mwanzuro asubiza bwangu ko ibyo ari “ubuzima bwite budakwiye kwinjirwamo n’abantu bose”.

Nyuma y’uko Nizzo ahanaguye aya mafoto, byatangajwe ko yashwanye n’uyu mukobwa gusa ntashobora kwemerera umunyamakuru niba byararangiye cyangwa bigikomeje ariko akoresha imvugo isa n’ibyemeza.

Urukundo rwa Nizzo na Umulisa Yvette rwaciye ibintu cyane guhera mu mwaka wa 2015 ari nabwo biyeretse itangazamakuru. Icyo gihe, uko umutima uteye Nizzo yashyiraga kuri Instagram amafoto y’uyu mukobwa w’imyaka 22 kayaherekeza amagambo yiganjemo kumugaragariza ko ‘yamwihebeye kandi amukumbuye’. Umulisa na we yacishagamo akandikira Nizzo amubwira ati “Nanjye ndagukunda cyane”.

Mu mwaka wa 2015 Nizzo yari yabwiye IGIHE ko yafashe umwanzuro ndakuka ko agomba kuzarushingana na Umulisa Yvette narangiza amasomo ya kaminuza mu Bushinwa. Ni nabwo yashimangiye bwa mbere ko yabonye undi mukunzi nyuma ya Anita Pendo [batandukanye muri 2011].

Icyo gihe yagize ati “ Ndamukunda cyane muri make, yagiye kwiga […] hashize nk’imyaka itatu dukundana. Ubu yagiye kwiga hanze, azagaruka nyuma y’igihe kinini ariko ni uwanjye, nanjye ndi uwe nziko ankunda.”

Amafoto yose afitanye isano n'iyi Nizzo yayahanaguye mu yo atunze

Muri Mutarama 2017 Umulisa Yvette yaje mu Rwanda mu biruhuko ndetse yagiye agaragara kenshi ari mu byishimo na Nizzo. Mu mezi abiri yahamaze bagiye basohokana kenshi gusa mu minsi isatira umusozo w’ibiruhuko ibyabo byajemo agatotsi, umukobwa amaze kurira indege imusubiza mu Bushinwa Nizzo yahise ahanagura amafoto ye yose nk’ikimenyetso gishimangira ko ‘ahari umuriro haboneka umwotsi’.

Nizzo n’uyu mukobwa ngo bamaranye imyaka itanu bakundana. Bivuze ko binjiye mu rukundo nyuma y’umwaka wa 2011 uyu musore agitandukana na Anita Pendo bakundanaga muri icyo gihe. Nyuma ya Anita, nta wundi mukobwa Nizzo yigeze agaragaza ko bari kumwe.

Nizzo wiyita 'Kaboss' ntiyerura ngo asobanure icyamuteye gusiba aya mafoto
Yvette yaje mu Rwanda muri Mutarama 2017 ahamara amezi abiri, nyuma yo gusubira mu Bushinwa ibye na Nizzo byahise bizamo agatotsi
Ubwo Yvette aheruka kuza mu Rwanda yagiranye ibihe byiza na Nizzo
Iyo foto yabo yigeze guca ibintu kubera uburyo basomaniye mu ruhame hanyuma inkumi igasiga Nizzo ibirungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza