Urwikekwe rwatumye Safi atabaza Humble Jizzo amakuru y’umwana yabyaye

Yanditswe na Munyengabe Murungi Sabin
Kuya 12 Werurwe 2018 saa 10:29
Yasuwe :
0 0

Safi Madiba ntagicana uwaka na bagenzi be bahoze baririmbana mu itsinda rya Urban Boyz, by’umwihariko yanze koherereza ubutumwa bw’ishimwe Humble Jizzo uherutse kwibaruka.

Humble Jizzo n’umukunzi we Amy Blauman bibarutse umukobwa mu ijoro ryo ku itariki ya 23 Gashyantare 2018. Abahanzi batandukanye bandikiye Humble Jizzo baha ikaze uyu mwana.

Safi Madiba wahoze ari inshuti magara ya Humble Jizzo nta kintu na kimwe yabivuzeho ndetse ntiyigeze abaza mugenzi we amakuru y’umwana baherutse kwibaruka. Mu kiganiro Samedi Détente gica kuri Radio Rwanda, Safi yavuze ko yabikoze nkana kubera umwuka uri hagati yabo.

Yagize ati “Ibintu tuba turimo hari imyumvire mike ku bantu bamwe na bamwe, simvuze ngo ni uruhe ruhande […] Nizera ko mu minsi izaza tuzahura tugasuhuzanya, tukabazanya amakuru tuti ‘umwana yarakuze’ tukishima, tukavuga neza. “

Humble Jizzo yatashye ubukwe bwa Safi Madiba ndetse yari mu basore bamwambariye, mu bahoze bagize Urban Boyz Nizzo ni we utaragaragaye mu bukwe ndetse nyuma biza kumenyekana ko atacanaga uwaka na Safi ari nayo mpamvu yanze kumutumira.

Safi yabajijwe niba yaracanye umubano wa burundu na bagenzi be bamaranye imyaka icumi mu itsinda asubiza mu buryo buca hejuru ikibazo agira ati “Akenshi urareba ese muri iyi myaka icumi mwaganiraga ibiki.”

Yongeraho ko bagikorana baganiraga ibyerekeye akazi bityo ko muri iki gihe buri wese acunga izamu rye. Ati “Ibibazo ndi kuvuga byari iby’akazi, twarabikemuye, kubikemura ni uko tutakiri kumwe kandi kuba tutakiri kumwe twarabikemuye abantu ntibumve ko byapfuye. Ibiganiro twagiranaga byakabaye bikiriho ariko ibyo twavuganaga twahuzwaga n’akazi, akazi ndimo ubu ni akanjye nka Safi Madiba.”

Safi yashimangiye ko ibyerekeye gutwita k’umukunzi wa Humble Jizzo n’uko baje kwibaruka ngo yabisomaga mu binyamakuru nk’abandi bose, nta kiganiro cyihariye yabivuganyeho na mugenzi we gusa ngo nibaramuka bahuye yizeye ko bazaganira bakishima.

Yagize ati “Ubu ari muri Amerika, njye nizera ko duhuye namubaza ibintu byose, ariko kwandikirana […]niba mu itangazamakuru baravugaga ngo umugore wanjye asigaje amezi arindwi, umugore wanjye yujuje amezi umunani, ibyo rero ntabwo mbizi mbisoma nk’uko ubisoma. Umuntu yibarutse rero sinajya kwihuruza, nanjye nkomeza gusoma nk’abandi.”

Safi na Niyonizera Judithe bo ntibarafata umwanzuro wo kubyarana, yashimangiye ko babanje gutegereza gusoza ibyerekeye ubukwe no gusezerana imbere y’Imana[babiteganya mu mwaka wa 2019].

Yagize ati “Hari ibintu by’ubukwe tutararangiza, turacyari muri gahunda y’ubukwe, n’ibindi rero bazajya babimenyeshwa nako bazagenda babibona.”

Safi Madiba nk’umuhanzi ku giti cye, amaze gusohora indirimbo eshatu iyitwa ‘Got it’, ‘Kimwe kimwe’ n’indi nshyashya aheruka gukorana na Rayvanny wo muri WCB ya Diamond.

Niyonizera Judithe umugore wa Safi ubu yaje mu Rwanda gusura umugabo we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza