Uwase yahawe ikamba mu gutora Nyampinga wa Afurika mu Buholandi (Amafoto)

Yanditswe na Munyengabe Murungi Sabin
Kuya 5 Ukuboza 2017 saa 10:07
Yasuwe :
1 0

Uwase Sandrine ari mu bakobwa bahawe ibihembo mu irushanwa mpuzamahanga ry’ubwiza ryahuje abo mu bihugu bitandukanye hatoranywa Nyampinga w’Umugabane wa Afurika mu Buholandi.

Uyu mukobwa w’imyaka 20 y’amavuko akomoka i Nyamirambo ari naho yavukiye gusa yagiye gutura mu Buholandi aho amaze imyaka igera kuri 15. Uwase yari mu bakobwa 12 bahataniye ikamba rya Nyampinga wa Afurika mu Buholandi ndetse yasoje ari muri batanu ba mbere bitwaye neza.

Uwase Sandrine wiga ishami ry’imbonezamubano muri kaminuza ya Hogeschool Rotterdam iri i Rotterdam yari ahatanye n’abakobwa barimo uwo muri Côte d’Ivoire, Guinea, Repubulika Iharanira Demokarasi ya Congo, Ethiopia, Cape Verde, Cameroon, Madagascar, Gambia, Afurika y’Epfo, Sierra Leone, Uganda ndetse na Ghana.

Nyampinga wa Afurika mu Buholandi ni umukobwa witwa Hawa Conteh wo muri Sierra Leone, uyu mukobwa kandi yanahawe ikamba ry’uwagaragaje impano kurusha abandi[Miss Talent].

Uwase Sandrine[bakunze kwita Sandra] yasoje irushanwa ahawe ikamba ry’umukobwa wakunzwe na benshi ku mbuga nkoranyambaga ndetse ni na we wagize amajwi menshi mu itora ryabereye kuri internet nk’ufite ikimero cyiza kurusha abandi.

Uwase Sandrine[bakunze kwita Sandra] yasoje irushanwa ahawe ikamba rya Miss Social Media

Ibihembo byose byatanzwe mu ijoro ryo kuwa Gatandatu tariki ya 2 Ukuboza 2017:

Miss Social Media - Miss Rwanda Sandra Uwase
Miss Congeniality - Miss Uganda Rebecca Namyalo
Miss Talent - Miss Sierra Leone Hawa Conteh
Miss Photogenic - Miss Sierra Leone Hawa Conteh
Igisonga cya Kane - Miss Uganda Rebecca Namyalo
Igisonga cya Gatatu - Miss Ethiopia Meron Bereket
Igisonga cya Kabiri - Miss Cape Verde Neila Pina
Igisonga cya Mbere - Miss Gambia Sohnajarra Ndure
Nyampinga wa Afurika- Hawa Conteh

Umukobwa watowe yasimbuye Claudia Nzeba ukomoka muri Repubulika Iharanira Demokarasi ya Congo watowe mu mwaka wa 2016.

Iri rushanwa rimaze imyaka itanu ribera mu Buholandi, ku nshuro ya mbere ikamba ryahawe umukobwa witwa Anthonia Raymond wo muri Nigeria nyuma asimburwa na Rosemary Kargbo wo muri Sierra Leone naho mu 2015 ikamba rihabwa Adama Jobe wo muri Gambia.

Photos: Collins T Photography


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza