Video: Dj Ira, umukobwa urangamiye kuba icyitegererezo mu kuvanga imiziki

Yanditswe na Munyengabe Murungi Sabin
Kuya 28 Ukwakira 2016 saa 11:45
Yasuwe :
0 0

Iradukunda Grace Divine [Dj Ira], umwe mu bakobwa bahanzwe amaso mu mwuga wo kuvanga imiziki mu Rwanda, ni mushya ariko yizeye ko umuhate n’imbaraga yabishyizemo bizamugeza ku rwego ruhambaye.

Dj Ira yinjiye mu cyiciro cy’abavanga imiziki mu mezi make ashize, yabyigishijwe na mubyara we Dj Bissosso wanamufashije kuzamuka no kumenyekana mu Rwanda. Sakubu Hassan[DJ Bissosso wigishije Dj Ira], ni Umurundi ufite ubwenegihugu bw’u Rwanda. Aza ku isonga mu ba Dj bakunzwe mu gihugu ndetse ni we witabazwa mu bitaramo bikomeye byose.

Dj Bissosso yazanye mubyara we Dj Ira i Kigali muri Kanama 2015 ubwo yari arangije amashuri yisumbuye ndetse nibwo yatangiye kubyiga. Dj Ira ngo yatangiye kwifuza gukora nk’ibya musaza we akiri muto gusa abo mu muryango baramwangira bamusaba ko yazabyinjiramo arangije kwiga.

Bissosso ati “Njye mpagaze neza nta kibazo, nk’ibisanzwe ndayoboye […] uriya ni mushiki wanjye , naramwigishije na we amaze kugera ku rwego rukomeye.”

Dj Ira yabwiye IGIHE ko amaze kwibona nk’umwe mu bakobwa bafite imbaraga ndetse bashobora ‘kuzagera ku rwego rukomeye muri uyu mwuga nk’uko Dj Bissosso yabimubwiraga agitangira kumwigisha’.

Mbere yo gutangira ibyo kuba Dj nari umunyeshuri i Burundi nigaga Informatique et télécommunication, ndifuza gukomeza muri Kaminuza, ndamutse mbibonye ni byo nakwiga. Mbona na Dj Bissosso bimutunze, mbona ko atari ibintu bito cyane, kuba nsanzwe mbikunda kandi nkaba mfite Bissosso bizamfasha kugera ku rwego rukomeye.”

Agitangira kubyiga yagiraga ubwoba cyane ariko Dj Bissosso akamukomeza ndetse akamwumvisha ko azabimenya akaba umuhanga ku rwego rwo hejuru. Iradukunda yigiriye icyizere akurikirana amasomo yahawe ari na cyo kimugejeje ku rwego ariho.

Yavuze ko muri uyu mwuga akora nk’umwe mu bakobwa bake bazwi mu Rwanda ahura n’imbogamizi zirimo nko kuba hari abasore bamubona mu kabyiniro akora akazi bakibeshya ko bashobora kumujyana mu zindi nzira mu buryo bworoshye.

Ati “Imbogamizi mpura na zo mu kazi kanjye, abantu bakeka ko umukobwa wese ukora ijoro byoroshye kumubona […] Ntabwo bintera ubwoba kuko mba nzi icyanjyanye, nkomeza akazi kanjye.”

Dj Ira yavangaga imiziki mu bitaramo bya Primus Guma Guma

Ubajije Dj Ira umuntu w’icyitegererezo kuri we agusubiza atajijinganyije ati “Ni Bissosso kuko ni we maze kubona cyane, ni we mbona hafi. Ambwira ukuntu ngomba kwifata, anyereka ibintu byose nzabona mu kazi, ni we cyitegererezo cyanjye.”

Dj Ira aje gukorera uyu mwuga mu Rwanda mu gihe habarurwa umubare muto w’abakobwa b’aba Dj. Mu bazwi bavugwa cyane barimo Dj Makeda ndetse na Anita Pendo na we wabyize abikuye kuri Bissosso.

Dj Ira na mubyara we Bissosso
Dj Ira ku kazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza