Video: Khalfan, umwe mu bamwenyuye kubera Primus Guma Guma

Yanditswe na Munyengabe Murungi Sabin
Kuya 11 Nyakanga 2018 saa 10:45
Yasuwe :
0 1

Ni ibyishimo bisa kuri Khalfan, umwe mu bahanzi bashya basogongeye ku byiza by’irushanwa risumba ayandi mu gihugu rya Primus Guma Guma Super rimaze imyaka umunani riba.

Khalfan ubusanzwe witwa Nizeyimana Odo, ari mu bahanzi bashya bahataniye irushanwa rya Primus Guma Guma Super Star ya munani imaze iminsi ibera mu bice bitandukanye by’u Rwanda. Mu bashya yinjiranye na bo, harimo Jay C bahuriye muri Hip Hop; Uncle Austin ndetse na Just Family yavuguruwe.

Iri rushanwa resize Khalfan azamuye mu buryo bukomeye umubare w’abakunda ibihangano bye, yigaragaje kandi nk’umuraperi ufite ijwi rifite imbaraga no kumenya kwitwara imbere y’abafana urebeye ku bitaramo byose bimaze kuba.

Urebye ku mazina mashya yinjiye mu irushanwa, Khalfan yagaragaje umwihariko haba mu buryo bwo gukurura abafana no kongera umubare w’abamuzi. Yakoraga ibishoboka akambara mu buryo busanisha injyana akora n’ibitaramo bya Roadshows byabaga byabereye hirya no hino mu gihugu.

Mu kiganiro na IGIHE, Khalfan yavuze ko iri rushanwa rimusigiye inyungu nini mu byerekeye ubuhanzi bwe. Yungutse mu buryo bw’amafaranga, umubare w’abafana warazamutse akurikije uko byari byifashe atarajyamo ariko ngo ikintu gikomeye yungutse ni uko ‘irushanwa ryamutumbagije cyane’.

Yagize ati “Ni njye muntu abenshi bibajijeho, bamwe bakavuga bati ‘uwo muntu turumva ashoboye’. Ikintu gikomeye byankoreye, byahise bintumbagiza cyane. Nageze imbere y’abantu ndaririmba bamwe barankunda, abandi nkabaririmbira bakareba ariko mu by’ukuri nta muntu wigeze ambwira ngo ‘ibyo ukoze hano ntabwo tubyemeye’.”

Yongeyeho ko irushanwa rya Primus Guma Guma Super Star yaryigiyemo kuririmba mu buryo bwa live ndetse by’akarusho akaba yaramenye kuganira n’itangazamakuru no kwigirira icyizere mu buryo bwose.

Yagize ati “Icyo binsigiye ni ukumenya kuganira n’itangazamakuru no kuririmba mu buryo bwa live ndetse no kwigirira icyizere aho ndi hose.”

Khalfan ni umwe mu baraperi bagaragaje imbaraga zikomeye cyane uyu mwaka

Mu guhitamo imyambarire no kwitoza uko yitwara ku rubyiniro, Khalfan ashingira ku bitekerezo ahabwa n’abo mu muryango we by’umwihariko nyina ndetse na mukuru we witwa Hussein ari na we wamubereye ikiraro kimwinjiza muri Hip Hop.

Mu gitaramo giheruka kubera mu Mujyi wa Rubavu, Khalfan yagiye yambaye mu buryo bushushanya uko abami bo muri Espagne basanzwe Bambara mu gushimangira ko ubu ‘ari we mwami wa Hip Hop’.

Ati “Nambaye nk’umwami kugira ngo bigaragare ko iyi njyana ibonye nyirayo. Hari abakoze neza babanje[abaraperi bagenzi be], mwakoze neza rwose basangirangendo mwabanje ariko ikintu cyo kuririmba no guhuza ubuhanzi nsa nabyo, nta mpamvu yo guhakana rero ko ntari umwami w’iyi njyana.”

Irushanwa rya Primus Guma Guma Super Star risigaje igitaramo kimwe kinini ari nacyo kizarisoza ku wa Gatandatu tariki ya 14 Nyakanga 2018 kuri Stade Amahoro i Remera.

Khalfan yinjiye mu irushanwa bamwibazaho ariko agezemo yerekana ko yari abikwiye
Khalfan yagaragazaga umwihariko ku rubyiniro
Aheruka kujya gutaramira i Rubavu yambaye mu buryo bwatangariwe cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza