Vj Spinny, umunyarwanda ukibyiruka uri mu bahagaze neza i Kampala

Yanditswe na Munyengabe Murungi Sabin
Kuya 14 Werurwe 2018 saa 11:50
Yasuwe :
0 0

Vj Spinny, izina rimaze kwigwizaho ibikorwa mu birori bikomeye bitegurwa mu Mujyi wa Kampala, ari mu bavanga umuziki bakunzwe muri Uganda ndetse yarenze imipaka ubu atangiye gucengera mu bindi bihugu.

Imihigo ni yose kuri VJ Spinny! Ibyari inzozi kuva agitangira mu mwaka wa 2010 ubu byahindutse impamo ndetse by’umwihariko izina rye rirakomeye mu bakora umwuga wo kuvanga umuziki muri Uganda.

Feri ya mbere azayikandagira amaze kuzenguruka Afurika

Vj Spinny ubusanzwe witwa Kalisa Joseph afite imyaka 22 y’amavuko, akomoka mu Rwanda mu Mujyi wa Kigali akaba yaratangiye kwiyumvamo impano yo kuvanga imiziki mu 2010 akiri mu mashuri yisumbuye muri Lycée de Kigali (LDK).

Mu mwaka wa 2014 akiyarangiza yahise atangira kubyihuguramo ndetse atangira gucuranga mu birori biciriritse, icyo gihe umushahara munini yabonaga wabaga ari ibihumbi bitanu ubundi agacurangira ubuntu.

Yabwiye IGIHE ko atigeze acika intege kuko yumvaga amaherezo bigomba kuzamutunga. Ati “Ntabwo nigeze ncika intege, ngitangira hari n’igihe nakoreraga ubuntu ubundi bakampemba bitanu ariko nkumva ngomba kubikomeza.”

Yongeyeho ati “Ubumenyi mfite, nta shuri na rimwe nabukuyemo, buri kintu naracyiyigishije bitandukanye n’uko abandi usanga barigishijwe. Ubumenyi bwose ni njye wabwishakiraga ibinaniye nkajya kubireba kuri YouTube uko abandi babikora, ni gutyo nazamutse.”

Ibirori byinshi muri Uganda Vj Spinny abigaragaramo muri iyi minsi; mu buryo buhoraho ni Dj w’akabari gakomeye ka Atmosphere Lounge gaherereye muri Kololo, aha niho abahanzi bakomeye muri Uganda bakunze kwicira icyaka.

Abicishije mu ikompanyi ye bwite yashinze yitwa Spinny Events, Vj Spinny ategura ibirori ngarukacyumweru bya “Girls in the city” bikabera muri Atmosphere Lounge, ibyamamare hafi ya byose muri Kampala usanga bibyiganiramo ku bw’umuziki w’uyu musore umaze kwigaragaza i Kampala.

Yagiye ategura ibitaramo bya Silent Disco bihuza abumva umuziki bambaye ecouteurs. Yabikoreye mu Mujyi wa Kigali, i Bujumbura mu Burundi ndetse bimaze kuba inshuro nyinshi i Kampala aho ateganya no gukorera ikindi gikorwa kuwa 31 Werurwe 2018.

Yagize ati “Nateguye ibitaramo muri Kampala inshuro nyinshi, mperutse kujya i Burundi no mu Rwanda naragiteguye kigenda neza. Ndashaka no kugera mu bindi bihugu nkagura impano yanjye, nzaruhuka maze kugera muri Afurika.”

Spinny asaruramo amafaranga menshi…

Yagize ati “Iyo byangendekeye neza, buri kwezi mbona amadolari ibihumbi bibiri. Ayo mvuze ava mu byo gucuranga aho nsanzwe nkorera mu buryo buhoraho ariko iyo nateguye na Silent Disco urumva ko muri uko kwezi amafaranga arazamuka cyane.”

Spinny yiga muri Kaminuza mu ishami rya BIT[Business Information and Technology] muri Cavendish University, azasoza muri Mutarama 2019. Yavuze ko amafaranga y’ishuri ayakura mu kuvanga umuziki.

Yagize ati “Ubu niga mu Mujyi wa Kampala muri Cavendish University, ni njye wiyishyurira ishuri, nditunze, ibintu byose ni njye ubyimenyera, ibi rero binyereka ko byangiriye akamaro.”

Yavuze ko kuba akorera mu Mujyi wa Kampala biri mu byamufashije cyane kugira ngo izina rye ryiyandike byoroshye. Mu bakora aka kazi barenga amagana, ari muri bake bakiri bato kandi bahagaze neza mu karere.

Yagize ati “Biramfasha cyane, ibijyanye no kuvanga imiziki hano muri Uganda hari iterambere rikomeye ndetse aba Djs ni benshi cyane. Iteka iyo ukorera i Kampala uhorana umutima wo kumva ko washakisha ubumenyi bwisumbuye kuko haba kurushanwa cyane hagati yacu.”

Umuziki w’iwacu watangiye gucengera muri Uganda, urebye nko mu myaka itanu ishize nibwo umuziki wacu batangiye kuwuha agaciro bagacuranga indirimbo z’abahanzi bo mu Rwanda. Abahanzi nabo barakangutse, ni ikintu cyiza nizera ko mu myaka iri imbere umuziki wacu uzagera kure.

Vj Spinny, umunyarwanda ukibyiruka uri mu bahagaze neza i Kampala

Bruce Melody na Charly na Nina, amazina yanguhira aba Djs i Kampala
Yagize ati “Bruce Melody arakunzwe hano cyane, abandi ni ba Charly&Nina. Mu bandi bacurangwa hano hazamo Dj Pius wenda na Jody. Muri Make abacurangwa kuri Radio za hano ni ba bandi bakunze kuza Kampala kumenyekanisha umuziki wabo.”

Ibanga ryayobeye abahanzi bo mu Rwanda

Yagize ati “Abahanzi bo muri Uganda ntabwo baryama, nka Bebe Cool uzasanga buri gihe afite indirimbo nshya kandi nziza. Ab’iwacu mu Rwanda rero iyo akoze akaririmbo kamwe kagakundwa ahita agenda akaryama akumva ko byakemutse, ibi nibyo bibica rero. Ikindi abo mu Rwanda, iyo yumva akunzwe ku karirimbo kamwe ahita atangira kumva ko umuntu wese uri bumutumire agomba kumuha amafaranga menshi bitaba ibyo ntibikunde.”

Spinny yavuze ko gukorera i Kampala bitoroshye ku ruhande rwe bitewe n’uko akora amasaha y’ijoro mu gihe benengango ari bwo baba bayakanuye. Yagize ati “Urabona dukora amasaha y’ijoro kandi umutekano wa Kampala ni muke, gutaha mu ijoro cyane hari igihe uhura n’abajura bakakwambura, ni cyo kibazo ahanini njye mbona.”

Mu kuvuga aba Djs afata nk’icyitegererezo, Spinny yagize ati “Dj Jazz Jef w’Umunyamerika, Dj Angelo wo muri London, abo ni abantu nifuza kuzagera ikirenge mu cyabo. Ni nk’uko umuhanzi aba yumva yazakora nk’ibya mugenzi we watangije injyana runaka, natwe muri uyu mwuga ni gutyo.”

Icyerekezo Spinny afite mu myaka iri imbere ni ugukora ibitaramo ku rwego mpuzamahanga ndetse ngo yatangiye gutekereza uburyo yazajya akorana indirimbo n’abahanzi bakomeye akanazitunganyiriza ubwe.

Ubumenyi bwose afite ni we wabwishakiye mu byerekeye kuvanga umuziki
Spinny yavukiye mu Rwanda ariko akorera i Kampala ari naho ari kuminuriza
Ibitaramo bya Silent Disco ategura biritabirwa cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza