Kwamamaza

Wizkid yageze i Mombasa aho agiye kuririmbana na Chris Brown (Amafoto)

Yanditswe kuya 7-10-2016 saa 22:08' na Munyengabe Murungi Sabin


Ayodeji Ibrahim Balogun [Wizkid] wo muri Nigeria yageze mu Mujyi wa Mombasa mu ijoro ryo kuri uyu wa Gatanu tariki ya 7 Nzeri 2016, aje kwitabira igitaramo gikomeye yatumiwemo.

Ni umuhanzi w’umuherwe akaba n’ikirangirire mu bagezweho muri Afurika. Muri iki gihe aharawe cyane mu ndirimbo zakunzwe na benshi nka One Dance yahuriyemo na Drake, Ojuelegba, Final (Baba Nla), Show You the Money, In My Bed, Bad ft Tiwa Savage, Mamacita yaririmbanye na Tinie Tempah n’izindi nyinshi.

Wizkid yageze ku kibuga cy’indege cya Moi International Airport aherekejwe n’abantu bane bagize ikipe imucungira inyungu, baje biyongera ku bandi bane barimo umujyanama mukuru wa Wizkid muri Afurika we yari amaze iminsi ibiri i Mombasa.

Ku kibiga cy’indege Wizkid yakiriwe na bake mu bagize itsinda ryateguye igitaramo cye mu Mujyi wa Mombasa. Yari yateguriwe imodoka zigezweho zigera muri esheshatu ndetse n’imodoka ya Polisi ishinzwe umutekano wo mu muhanda yamuherekeje.

Muri iki gitaramo cya Mombasa Music Festival, Wizkid azaririmbana na Chris Brown wo muri Amerika. Aba bombi bazaririmbira ahitwa Golf Beach Club ku nkombe z’inyanja y’Abahinde.

Ubuyobozi bwa Mombasa Rocks yateguye iki gitaramo babwiye IGIHE ko Chris Brown yamaze guhaguruka muri Amerika n’indege ye bwite, mbere y’uko agera i Mombasa yabanje guca i Nairobi gukora ikiganiro kuri Citizen TV abwira abafana be muri Kenya ko yahageze.

Chris Brown agomba kugera mu Mujyi wa Mombasa ahagana saa tanu n’igice z’ijoro, aherekejwe n’ikipe y’abantu akorana na bo bya hafi. Mbere ye habanje kuza indege itwaye itsinda ry’ababyinnyi be n’abazamufasha mu gitaramo azakora kuri uyu wa Gatandatu.

Mu ijoro ryo kuri uyu wa Gatanu, Wizkid na Chris Brown bategerejwe mu muhuro ubanziriza igitaramo nyamukuru. Mu gitondo cyo kuri uyu wa Gatandatu aba bahanzi bazakora imyitozo ya nyuma no gusuzuma niba ibyuma bimeze neza.

Mu bahanzi bagomba kuririmba hiyongereyemo Navio wo muri Uganda ndetse Ali Kiba na Vanessa Mdee bo muri Tanzania.

Kwinjira muri iki gitaramo ni amashilingi ya Kenya 14,000 ku bantu babiri[agera ku bihumbi ijana mu mafaranga y’u Rwanda] mu gihe umuntu umwe mu myanya y’icyubahiro ari ukwishyura ibihumbi 30 by’amashilingi ya Kenya.

IGIHE irakomeza gukurikirana urugendo rwa Chris Brown na Wizkid mu Mujyi wa Mombasa ahategerejwe n’abandi bahanzi bakomeye muri Afurika bagomba kuza kukireba.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved