Yemba Voice, itsinda rihuriwemo n’abanyempano biga umuziki ku Nyundo

Yanditswe na IGIHE
Kuya 27 Mutarama 2017 saa 05:15
Yasuwe :
1 1

Itsinda Yemba Voice rihuriwemo n’abasore batatu basanzwe biga umuziki mu ishuri rya Nyundo bagiye kumara amezi atanu bahurije hamwe imbaraga, batangiye kwigaragaza nk’abaririmbyi bafite umwihariko mu mpera za 2016.

Uko ari batatu bavuga ko kwishyira hamwe kwabo bikwiye gutuma buri wese ategerezanya amashyushyu ibikorwa bya muzika aho bemeza ko hari ibintu bidasanzwe biteguye gukora.

Yemba Voice igizwe n’abaririmbyi batatu Mugabutsinze Moise asanzwe acuranga gitari, anafite ubuhanga mu kuririmba no kuvuza ingoma, undi yitwa Ruzima Bill [araririmba akanakirigita inanga ya Kinyarwanda] ndetse na mugenzi wabo witwa Rusanganwa Norbert uririmba akanabikomatanya no gucuranga gitari.

Aba baririmbyi uko ari batatu bamaze imyaka ibiri biga kuririmba no gucuranga mu ishuri rya muzika ku Nyundo, baririmba mu ndimi zirimo Icyongereza, Igifaransa, Igiswahili, Ikinyarwanda n’izindi.

Mugabutsinze Moise yabwiye IGIHE ko Kuvuka kw’iri tsinda byatewe n’uko ubwo itsinda rya Sauti Sol ryazaga mu Rwanda aba basore bagize amahirwe yo gusubiriramo indirimbo ‘Shake Yo Bam Bam’ y’iri tsinda ryo muri Kenya abantu bakabereka ko babishimiye cyane.

Uyu muhanzi yavuze ko kwishyira hamwe kwabo bizabongerera imbaraga, bikabafasha kugera kure mu muziki.

Yagize ati "Tuzagerageze gushyira hamwe imbaraga dufite kandi tugerageze gukora kugira ngo turusheho gutera imbere. Uko turi batatu ibyo ashoboye nanjye mfite ibyo nshoboye cyane kandi buri wese ashobora gukora ku giti cye bigakunda ariko twashatse guhuriza hamwe izo mbaraga kugira ngo birusheho kuba byiza cyane.”

Yongeyeho ko nyuma yo gusohora indirimbo ‘African Woman’ bafite indi mishinga y’indirimbo bateganya kuzashyira hanze mu gihe cya vuba harimo inshyashya yitwa ‘So Sweety’ bafite muri studio ya Producer Bob, iyi bayishyuriwe na The Ben wanyuzwe cyane n’ubuhanga bwabo.

Yagize ati “Imishinga dufite imbere ni myinshi harimo indirimbo iri kwa Producer Bob yitwa So Sweety iyi ndirimbo twayishyuriwe na The Ben kubera ko yishimiye impano yacu arayitwemerera izindi ni ubufatanye n’abandi bahanzi muri make ibikorwa biri mu nzira kandi bizaba ari byiza cyane ku buryo bizatum ahari aho tugera.”

Ubwo Sauti Sol iheruka kuza mu Rwanda yatumiye Yemba Voice ku rubyiniro bafatanya kuririmba 'Shake Yo Bam Bam'

Mugabutsinze yavuze ko mu byo bashyize imbere harimo gushyira ingufu cyane mu kunoza imiririmbire no kwihugura cyane mu bijyanye no kuririmba mu buryo bw’umwimerere. Ati “Ikindi twifuza ni uko tuzajya dukora umuziki wa live tuzagerageza gukora cyane kugirango dushimangire ibyo twigishwa mu ishuri.”

Ijambo ‘Yemba’ barikomoye mu rurimi rwa Lingara risobanura mu Kinyarwanda ‘ririmba’, naho Voice ni ijambo ry’Icyongereza risobanura ‘Ijwi’.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza