Bamwe mu bahanzi nyarwanda bahangayikishijwe n’ubuhanuzi ko isi igiye kurangira

Bamwe mu bahanzi nyarwanda bahangayikishijwe n’ubuhanuzi ko isi igiye kurangira


Yanditswe kuya 13-11-2012 - Saa 17:02' na Vénuste Kamanzi

Mu gihe bikomeje kuvugwa ko isi ishobora kurangira tariki 21 Ukuboza 2012, abahanzi nyarwanda batandukanye batangaza ko bibateye impungenge biramutse bibaye impamo.

Hashize imyaka isaga ibihumbi bibiri abantu bo mu bwoko bw’Abamaya bo muri Amerika yo hagati bakoze ikirangaminsi cyabayoboraga, cyariho iminsi bizihizaga nk’uko izo tugenderaho ubu z’Abaroma zimeze, hakanabaho amatariki y’ubuhanuzi n’ibizajya biyabaho. Icyo kirangaminsi kigaragaza ko mu mwaka wa 2012 ari bwo isi izarangira. Abahanga baje kugaragaza ko itariki bashakaga kuvuga ari tariki 21 Ukuboza 2012.

Dore ibyiyumviro by’abahanzi batandukanye kuri ubwo buhanuzi baganiriye na IGIHE kuitariki 13 Ugushyingo 2012.

Masamba Intore ati “ntabwo mbyemere na gato, njyewe nditeguye kuko Imana turi kumwe kandi tuzajya mu ijuru.”

Masamba asanga niyo byaba ukuri isi ikarangira ntacyo yaba ahombye, kuko icyo yifuzaga nyuma yo gukurira mu buhungiro ari igihugu none yarakibonye.

Umuraperi akaba n’umunyamakuru Pacson we ati ”tumaze kubona abahanuzi benshi bavuga ko isi izarangira kandi ntibibeho, nibigera bizagere ngewe nemerera mu Mana kandi nshimira Imana kubyo imaze kungezaho.”

Pacson we yababazwa n’uko isi yaba irangiye nta mwana afite atabonye isuraye kandi ataneretse ababyeyi umwuzukuru.

Ngenzi Gaga uzwi cyane mu gukina filime, we yadutangarije ko nta ni byo yari azi, gusa ngo biramutse bibaye yababazwa n’uko hari byinshi yapanze yaba atagezeho. Ati “Nifuza guteza imbere umuryango wanjye, gukorera Imana nk’uko mbyifuza no kubaka company (kompanyi) ikomeye.”

Alain Mukuralinda, umuvugizi w’ubushinjacyaha bw’u Rwanda akaba n’umuhanzi w’inararibonye avuga ko nawe ubwo buhanuzi yabwumvise, ariko atabwemera na gato, kuko ibyo ubwo buhanuzi bwavuze ko isi izaringanira n’imibumbe iri mu isanzure byigeze kubaho no mu 1998 nyamara isi ntigire icyo iba, n’umwaka wa 2000 wahanuweho byinshi ntibyaba.

Ati”biramutse bibaye nababazwa n’uko isi yaba irangiye abantu bose batabonye amahoro, ngo babeho mu mahoro.”

Umuhanzi uririmba indirimbo zo kuramya no guhimbaza Imana Dominic Nick yatangarije IGIHE ko nta gaciro abiha kuko byahereye kera bivugwa nyamara isi ikaba itararangira.

Ati “Imana nibivuga nibwo nzabyemera kuko niyo yonyine izi igihe isi izarangirira, ntacyambabaza cyane kuko n’ubusanzwe isi izarinda irangira umwana w’umuntu agifite imigambi n’ibintu byinshi yifuza kugeraho, kereka isi irangiye Imana itabizi.” Gusa ngo bibaye yababazwa cyane n’uko hariho abataramenya Imana, bakiri mu businzi, uburaya, inzangano zo mu mitima, n’ibindi byaha.

Umubyeyi Nzayisenga Sofia uzwiho gucuranga inama gakondo, nawe ngo yari yarabyumvise ariko ntabwo abyemera, kuko Yesu ajya kugenda yasize avuze ko abantu bagomba guhora biteguye.

Ati “Ari ibyo abantu bose ntawarimbuka, sinteganya kuzapfa ejobundi, nababara cyane kuko mfite abana bato b’abajyambere nkeneye kureba amabyiruka yabo, nkareba ubukumi nkareba ubusore bwabo, nkabashyingira.”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO