Abana bagaragaje ubuhanga mu gitaramo cya Korali Ijuru

Yanditswe na Munyengabe Murungi Sabin
Kuya 28 Ukuboza 2016 saa 04:30
Yasuwe : XX
0

Abitabiriye igitaramo cya Korali Ijuru banyuzwe n’ubuhanga bw’abana baririmbyemo, cyabereye mu Mujyi wa Huye kuri uyu wa Mbere taliki ya 26 Ukuboza 2016.

Iki gitaramo cyatangiye ahagana saa kumi n’ebyiri z’umugoroba kigeza saa tatu n’igice, muri Hoteli Galileo iherereye mu Mujyi wa Huye, aho abari bacyitabiriye bagera kuri 250 batashye bagaragaza ko banyuzwe n’umuziki wa classique wacuranzwe.

Kolari Ijuru ya Kathedrale Gatolika ya Butare yaririmbye indirimbo 24 mu byiciro bitatu, aho buri kimwe cyari kigizwe n’indirimbo umunani zirimo iz’abahanzi bazwi cyane nka Mozart, Boney M, Bethooven, Tony Britten mu ndirimbo ya UEFA Champions Leagues yahimbye n’abandi.

Ubwo basozaga icyiciro cya mbere, abitabiriye igitaramo baje kwishima kurushaho ubwo bararimbirwaga na kolari y’abana bato bari munsi y’imyaka icumi maze batangazwa n’ubuhanga baririmbana indirimbo mu ndimi z’amahanga nk’Icyongereza, Ikidage n’izindi.

Ibi byagaragajwe n’uko abari mu gitaramo bahagurutse batangira gukoma amashyi bagaragaza ibyishimo, noneho biba akarusho ubwo umwe muri abo bana witwa Muhirwa Rene Kheira w’imyaka umunani y’amavuko yaririmbaga indirimbo yitwa ‘Feliz Navidad’ (bisobanuye ngo Noheri Nziza) iri mu rurumi rw’Icyesipanyole, ikaba yarahimbwe na José Feliciano uvuka muri Puerto Rico mu mwaka wa 1970.

Ubuhanga uyu mwana yaririmbanye iyi ndirimbo, bwatumye abatari bake bananirwa kwifata bagaragaza ibyishimo bidasanzwe, ku buryo hari bamwe bazenze amarira mu maso kubera ibyishimo n’umunezero.

Nyuma yaho Kolari Ijuru yagarutse iririmba igice cya Kabiri cy’indirimbo, igeze ku musozo, yakira undi mwana witwa Neza Bihire Yvon, w’imyaka itanu y’amavuko waririmbye wenyine indirimbo yitwa “The Trumpet shall Sound”[bisobanuye ngo Impanda izavuga] ikaba yarahimbwe na F. Haendel ukomoka mu Budage.

Iki gitaramo cyitabiriwe n’abayobozi batandukanye barimo ab’inzego bwite za Leta, abayobora Kiliziya Gatolika n’abandi banyacyubahiro basanzwe bakunda indirimbo za Korali ijuru.

Mu ijambo rye Musenyeri Gahizi Jean Marie Vianney, Umuyobozi mukuru wa Kaminuza Gatolika mu Rwanda, yagarutse ku burere bw’abana, ashima uburyo Kolari Ijuru yita ku gutoza abana umuco mwiza wo kuririmbira Imana, asaba ko ababyeyi bose bakora batyo.

Musenyeri Gahizi ati “Mfite inzozi zo kubona kolari y’abana, bakura kuririmbira Imana barabigize umwuga, birashimishije kuba Kolari Ijuru yarashyizeho n’uburyo bwo gutoza abana […] aba bamalayika baturirimbira kuri buriya buryo bakatubyinira, mu minsi iza ni bo bazaba bafite umutima, ariko muzane n’abandi tugire naho tugira kolari y’abana iririmba Misa.”

Ababyeyi batahanye ingamba zikomeye

Nyuma yo kwibonera uburyo abana baririmbana ubuhanga mu gitaramo, bamwe mu babyeyi by’umwihariko abari muri Kolari Ijuru babwuiye IGIHE ko batahanye umwanzuro ko bagiye kuzana abana babo bagatangira kwigishwa kuririmba.

Neza Bihire Yvon yarirmbye indirimbo yitwa The Trumpet shall Sound, benshi batangarira ubuhanga bwe

Umuyobozi wa Kolari Ijuru, Potien Bizimana yagize ati “Iki kintu ni cyiza na Musenyeri yakivuzeho, abana turabafite kuko abantu 40 bagize Kolari Ijuru bose bafite abana [...] kuko twabonye ko abana bashimisha abantu, mu gitaramo cy’ubutaha turateganya ko tuzaba dufite Kolari y’abana ifatika igizwe n’abana nka 30”.

Ababyeyi bari bitabiriye icyo gitaramo baganiriye na IGIHE bavuze ko bashingiye ku burere n’ikinyabupfura biranga abana bato baririmba muri Kolari ijuru, nabo bifuza kuzajyanayo abana babo.

Egide Kayitare ati “Njyewe nishimye cyane ndavuga nti ‘ugize Imana muri Kolari Ijuru ni ahantu warerera’, kuko nabonye ari ahantu umwana akurira afite ikinyabupfura kandi akunda Imana, kuko ni uburyo bwiza bwo gutegura urubyiruko ruzira ingeso mbi, ahubwo ruharanira ibyiza gusa no kubaka igihugu ndetse no kugiteza imbere”.

Korali Ijuru ya Kathedrale ya Butare, imaze imyaka igera kuri 28 ivutse kuko yaririmbye bwa mbere mu misa yabaye kuri Pasika mu mwaka wa 1988. Kuri ubu ifite abanyamuryango bahoraho bagera kuri 80.

Iki gitaramo cyabaye kuwa mbere wa Noheri, ikaba yaragiteguye mu rwego rwo gufasha abanye-Huye guhama muri Noheri no gusoza neza umwaka wa 2016 binjira muri 2017.

Abana bato bagaragaje ko bazi kuririmba bishimirwa na benshi
Muhirwa Rene Kheira (uri imbere) aririmba indirimbo yitwa ‘Feliz Navidad’ yakoze ku mitima ya benshi
Musenyeri Gahizi Jean Marie Vianney yavuze ko afite inzozi zo kubona Kolari y'abana iririmba Misa yose

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza