Patient Bizimana azafasha Light Gospel Choir mu gitaramo cyo kumurika album ya mbere

Yanditswe na IGIHE
Kuya 16 Werurwe 2017 saa 07:10
Yasuwe :
0 0

Light Gospel Choir ikorera umurimo w’Imana muri Bethesda Holy Church ku Gisozi mu Mujyi wa Kigali yateguye igitaramo cyo gushima Imana izanamurikiramo album ya mbere yakoze mu myaka ine imaze ishinzwe.

Uko umwaka utashye Light Gospel Choir ikora ibiterane bitatu, kuri iyi nshuro icya mbere izakora kizaba ku Cyumweru tariki ya 19 Werurwe 2017, yateguye ikindi izakorera mu Mujyi wa Nyamata muri Mata ndetse n’igisoza umwaka kizaba mu Ugushyingo 2017.

Mu gitaramo cyo kumurika album ya mbere ya Light Gospel Choir batumiye umuhanzi ukunzwe cyane Patient Bizimana. Umuyobozi wa Light Gospel Choir, Rutagengwa Emile yavuze ko iki gitaramo cy’uyu mwaka kizaba ari umwihariko kuko ari nabwo bazamurika album ya mbere bakoze nyuma y’imyaka ine bashinzwe.

Yagize ati “Buri mwaka dutegura igiterane nk’iki, twateguye igiterane cyacu cy’ivugabutumwa twifuza kuzamurikamo album ya mbere twitiriye indirimbo yacu yitwa ‘ Yansezeranyije byinshi’. Impamvu twahisemo kuyita gutya ni uko ari yo twasohoye bwa mbere tugitangira umurimo”.

Album ya mbere ya Light Gospel Choir igizwe n’indirimbo icumi z’amajwi n’iz’amashusho, Umuyobozi w’iyi korali yavuze ko kuba bari bamaze imyaka ine badakora CD ibumbiyeho indirimbo zabo ngo ‘byaterwaga n’amikoro yari akiri make’.

Yagize ati “Urabizi ko umurimo w’Imana ntabwo ari Business dukora , ahubwo ni ubwitange. Ibintu dukora bisaba ubushobozi buhagije , urabona gukora indirimbo mu majwi no mu mashusho ni ibintu bisaba amafaranga kandi abakora umurimo w’Imana mu kuririmba tuba tudafite amafaranga adahagije. Bisaba kwisuganya buhoro buhoro kugira ngo tugera ku bikorwa nk’ibi.”

Muri iki gitaramo iyi korali izafatanya na Patient Bizimana , Healing Worship Team , Sauti Hewan , Bethesda Choir , Boenegers na Herman Worshippers Inter. Igitaramo kizaba kuri iki Cyumweru guhera saa cyenda z’amanywa kuri Bethesda Holy Church ku Gisozi.

Patient Bizimana yatumiwe muri iki gitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza