Amir wakoze ’Ese Nzapfa’ ya Paccy yahishuye uko yigishije Lizer ukora indirimbo za Diamond

Yanditswe na Muvunyi Arsène
Kuya 19 Werurwe 2019 saa 07:42
Yasuwe :
0 0

Amir Mugisha uzwi nka Amir Pro ni umwe mu bashyize itafari mu kubaka umuziki wo mu Rwanda, ubwo wari ugifite igicumbi mu Karere ka Huye.

Mu 2008 yavuye iwabo i Burundi ajya mu Mujyi wa Huye mu Rwanda, aho yari abonye akazi muri studio yitwaga ubuntu yakorewemo indirimbo nyinshi z’abahanzi bakomeye kuri ubu nka Tom Close, Urban Boys, The Ben, Oda Paccy n’abandi.

Amir yabwiye IGIHE ko mu ndirimbo nyinshi yakoreye abahanzi b’abanyarwanda iyo afiteho urwibutso rukomeye ari ‘Ese Nzapfa’ ya Oda Paccy.

Ati “Ikintu nibuka cyane ni uburyo Paccy turi gukora iriya ndirimbo twamusezererezaga ngo izatuma abyibuha kuko yari ananutse cyane, nishimira ko byabaye.”

Ubwo yarekaga gukorera mu Rwanda, yasubiye i Bujumbura akorera muri studio zitandukanye gusa kuri ubu afite iye yitwa MA Production.

Amir ni umwe mu batunganya imiziki bakomeye i Burundi kuri ubu. Yakoze indirimbo nyinshi zakunzwe nka No Love ya Sat-B, Doda ya DJ Paulin, B Face na MB Data, Natamani ya Lolilo na Diamond Platunmz n’izindi nyinshi.

Uyu mugabo yanahishuye ko ari we wigishije Siraj Khamees uzwi Lizer Classic wakoze indirimbo nyinshi za Diamond Platnumz nka Jibebe, Kwangwaru, Fire yakoranye na Tiwa Savage n’izindi nyinshi zikorerwa muri Wasafi Records.
Ati “Hari umuntu uba ukunda ikintu ariko adafite uburyo agikora. Aravuga ati ‘reka negere Amir atwereke uburyo bikorwa.’ Icyo gihe yari Lizer n’undi witwa Rubanza Jay, baraza nkajya mbereka nti ‘ibi ni uko babikora’, ndababwira nti ‘muve mu Rumonge muze i Bujumbura.”

Nyuma yo kwigira kwa Amir, Lizer yaje gushinga studio ye mu Mujyi wa Bujumbura ari naho yahuriye na Diamond Platnumz ubwo yakoranaga indi ndirimbo na Lolilo.

Amir ati “ Ubwo Diamond yaherukaga gukora igitaramo mu Burundi, yakoranye indi ndirimbo na Lolilo, bayikorana na Lizer. Urumva niho Diamond yabonye Lizer akunda uko akora aramushima, yari afite inshuti ye iramubwira iti hamagara wa muhungu aze muri Wasafi.”

Kugeza ubu Lizer amaze kugera ku rwego rwo hejuru mu Karere ka Afurika y’Uburasirazuba. Aherutse guhabwa akazi ko gutunganya indirimbo z’abahanzi bitabiriye Coke Studio Africa intebe yanyuzemo abakomeye nka Masterkraft na GospelOnDeBeatz bo muri Nigeria, DJ Maphorisa wo muri Afurika y’Epfo n’abandi.

Kuri we Amir ntabifata nko kuba yararuswe n’umwana yigishije kuko nawe akora indirimbo zigakundwa, ahubwo ngo ni amahirwe yagize yo kujya aho akora ibikorwa bigera kure.

Ati “Sinavuga ko yandenze kuko buri wese akora ibikorwa bigashimwa. Hari ubwo ushobora gukora ikintu kikagera kure undi yagikora ntikihagere. Si ukuvuga ngo aba abizi cyane kurusha abandi bose ahubwo navuga ko ari amahirwe yagize.”

Amir yemeza ko we na Lizer bakiri inshuti dore ko akimwifashisha mu gihe hari ikimuyobeye.

Ese Nzapfa ni imwe mu ndirimbo zikomeye za Paccy

Amir aherutse gukora indirimbo yitwa Doda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza