Abajura bacukuye imva ya Ssemwanga wahoze ari umugabo wa Zari

Yanditswe na Bukuru JC
Kuya 6 Ukuboza 2017 saa 06:24
Yasuwe :
0 0

Abantu bataramenyekana bacukuye imva ishyinguwemo Ivan Ssemwanga wahoze ari umugabo wa Zari Hassan[The Boss Lady] mu ijoro ryo kuwa Kabiri tariki ya 5 Ukuboza 2017.

Ivan Ssemwanga yitabye Imana ku wa 25 Gicurasi 2017, yaguye muri Afurika y’Epfo mu Bitaro bya Steve Biko biri i Pretoria, azize indwara yo guturika imitsi yo mu mutwe. Yapfuye hashize ibyumweru bibiri yitabwaho n’abaganga ndetse yarabazwe ariko ntibyagira icyo bitanga.

Mu gushyingura Ivan Ssemwanga abakire bagenzi be bamusasiye imikufi, ibikomo n’inoti z’amoko anyuranye ari nacyo cyatumye mu bihe bitandukanye abajura bagerageza kuyipfumura ngo bataburure ubutunzi buhishemo.

The New Vision yatangaje ko imva ya Ssemwanga iri mu gace ka Naklilo yatewe n’abajura bagishakishwa bagerageza gucukura ngo binjiremo imbere bavanemo amafaranga ariko umugambi wabo upfuba bataragera ku ntego.

Abatangabuhamya bageze ku mva ya Ivan Ssemwanga mu gicuku cyo kuwa Kabiri bavuze ko ‘umugambi wabo waburijwemo n’imbwa zamotse maze bashya ubwoba bakeka ko baguwe gitumo amaguru bayabangira ingata’.

Iyi mva itewe n’abajura mu gihe umuryango wari warashyizeho abacunga umutekano bahabwa umushahara uhoraho mu kwirinda ko umuntu wabo yazatabururwa. New Vision ivuga ko hari amakuru yizewe ashimangira ko abacungaga umutekano w’iyi mva bananirwanwe n’umuryango ku bwo kutabaha umushahara nk’uko babyumvikanye.

Aba barinzi ngo bishyuwe ukwezi kwa mbere gusa nabwo bahabwa amashiringi 600,000 mu gihe bari barumvikanye ko bazajya bahembwa miliyoni.

Ivan Semwanga yari umunyemari uzwi cyane muri Uganda gusa izina rye ryashinze imizi muri Afurika y’Uburasirazuba ahanini kubera urukundo rwe na Zari n’uruhare yagize mu iterambere rya Uganda mu buryo butandukanye. Yitabye Imana ku wa 25 Gicurasi 2017, yaguye muri Afurika y’Epfo azize indwara yo guturika imitsi yo mu mutwe.

Nyuma y’ishyingurwa rye, hatanzwe ibirego byasabaga ko imva ya Ivan Ssemwanga itabururwa bakavanamo amafaranga arimo. Uwitwa Abbey Mugugu ni we wari wakamejeje asaba ko leta itanga uburenganzira bwo gucukura imva ya Don Ivan Ssemwanga.

Mbere yo kururutsa Ivan Ssemwanga, habanje kunyanyagizwamo amafaranga

Icyo kirego cyanashyiraga mu majwi A-plus funeral management yateguye uburyo bwo gushyingura ndetse na Banki Nkuru ya Uganda kutagira icyo ikora ku byakozwe ubwo Ivan Ssemwanga yashyingurwaga.

Imva ya Ssemwanga yashashwemo amashilingi ndetse hanyanyagijwemo amadolari nk’ikimenyetso gishushanya ubutunzi bw’uyu wahoze ari umugabo wa Zari ari nacyo gituma agatima k’abajura gahora karehareha.

Zari na nyakwigendera Ssemwanga bagiranye amateka y'imyaka icumi mu rukundo
Zari aheruka gusura imva ya Ssemwanga bimuviramo ibitutsi
Uyu mugore acunga imitungo imwe n'imwe ya Ssemwanga muri Afurika y'Epfo
Zari yavuze ko igikorwa yakoze cyo gusura imva ya Ssemwanga yari yanagisabwe n'abana babyaranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza