Abakozi b’ibitaro Kanye West yarwariyemo bari kwirukanwa umusubirizo

Yanditswe na Dusabimana Aimable
Kuya 21 Ukuboza 2016 saa 03:04
Yasuwe : XX
91 55

Nyuma y’ibyumweru bitatu umuraperi Kanye West asezerewe mu bitaro bya Ronald Reagan UCLA Medical Center byamukurikiranye mu bihe by’uburwayi bwe, abaganga n’abandi bakozi babyo batangiye gukorwaho iperereza, bivugwa ko abenshi bahise birukanwa.

Ku gicamunsi cyo ku wa 21 Ugushyingo 2016 nibwo Kanye West yajyanywe mu bitaro mu Mujyi wa Los Angeles, yari yagize ibibazo by’uburwayi butunguranye bwari uruhurirane rw’ibibazo byo mu mutwe, ihuzagurika mu mitekerereze, n’umunaniro ukabije wamubuzaga amahwemo ntabashe gusinzira.

Nyuma y’ibyumweru bitatu Kanye West asezerewe, TMZ yatangaje ko uburwayi bwe no gukurikiranirwa muri ibi bitaro bya UCLA Medical Center byagize ingaruka ku bakozi benshi babyo bagerageje kureba amakuru y’ibanga y’ahahise ku buzima bw’uyu muraperi.

Hari amakuru avuga ko ubuyobozi bw’ibi bitaro Kanye West yari arwariyemo bumaze iminsi bukora iperereza ridasanzwe, hari n’abakozi bivugwa ko birukanwe cyangwa bashobora gusezererwa nibahamwa n’icyaha.

TMZ yakomeje ivuga ko bagerageje kuvugisha ubuyobozi bw’ibitaro bya UCLA Medical Center ariko bukanga kugira icyo butangaza kuri ayo makuru kuko "batajya bavuga mu itangazamakuru ibyerekeranye n’abakozi bakoresha."

Ikinyamakuru Mirror cyo mu Bwongereza cyanditse ko cyagerageje kubaza amakuru y’impamo ku iyirukanwa ry’abakozi babyo bagerageje kureba muri mudasobwa ibitse amakuru yo kwa muganga yerekeranye na Kanye West, ariko umuvugizi w’ibi bitaro yari arwariyemo akanga kugira icyo abitangazaho kuko "batajya bavuga mu itangazamakuru ibyerekeranye n’abakozi bakoresha."

Umwe mu bantu begeranye na Kanye West yavuze ko uyu muraperi atarahamagarwa ngo agire icyo amenyeshwa ku byerekeranye n’iki kibazo.

Abakozi mu bitaro Kanye West aherutse kuvurirwamo bari kwirukanwa umusubirizo

Mu bitaro Kanye West yari arwajwe n’umugore we Kim Kardashian. Yasezerewe ku mugoroba wo kuwa Gatatu tariki ya 30 Ugushyingo 2016. Bivugwa ko yamaze iminsi yariheje mu muryango we ajya kuba wenyine kugira ngo yongere gusubira ku murongo.

Mu masaha y’umugoroba wo ku wa 8 Ukuboza uyu muraperi yongeye kugaragara mu ruhame, nyuma y’iminsi itanu ahita asura Perezida mushya wa USA, Donald Trump, mu biro bye biri mu mutururirwa wa Trump Tower uherereye mu gace ka Manhattan mu Mujyi wa New York bagirana ibiganiro byihariye.

Hari andi makuru yagarutsweho cyane avuga atameranye neza na Kim Kardashian gusa abo mu muryango w’umugore babinyomoje rugikubita. Aba bombi baherutse no kongera kugaragara basohokanye nyuma y’iminsi y’uburwayi bwafashe Kanye West.

Kanye West ngo ntarabwirwa iby'abakozi batejwe ibibazo n'amakuru amwerekeyeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE