Britney Spears mu buryohe bw’urukundo n’umusore arusha imyaka 12

Yanditswe na IGIHE
Kuya 4 Werurwe 2017 saa 12:02
Yasuwe :
1 0

Umuririmbyi Britney Spears ari mu byishimo bikomeye ku bw’umukunzi we Sam Asghari wujuje imyaka 23 y’amavuko, aba bombi bamaze amezi atageze kuri abiri bakundana.

Britney yakundanye na Sam Asghari nyuma y’uko bahuje urugwiro cyane ubwo bakoraga amashusho y’indirimbo ‘Slumber Party’, uyu musore yahuje n’ibyiyumvo by’uyu muhanzi bityo amwemera nk’umugabo yifuza ko bazakomezanya urugendo rw’urukundo.

Kuri uyu wa 3 Werurwe 2017, Sam Asghari usanzwe ari umunyamideli yizihije imyaka 23 y’amavuko, Britney Spears yamwoherereje ubutumwa amwereka ko amwishimiye ndetse ko aryohewe n’ibihe bagirana. Umusore na we yanditse ku mbuga nkoranyambaga ashimira umukunzi we ‘ku bwo kumuhesha icyubahiro’.

Britney Spears yandikiye Sam Asghari ku mbuga nkoranyambaga agira ati ‘Isabukuru y’amavuko ku mukunzi wanjye’, yahise ashyira kuri Instagram ifoto y’umutsima w’isabukuru y’uyu musore wanditseho amazina ye bwite.

Britney Spears w’imyaka 35 yakunzwe bikomeye mu ndirimbo zirimo ’I’m a Slave 4 U’, ’Gimme More’, ’Pretty Girls’, ’Womanizer’ n’izindi. Muri iki gihe aharawe mu yitwa ’Make Me’ aherutse gukorana n’umuraperi uri kwigaragaza muri USA witwa G-Eazy.
Ikinyamakuru US Weekly giherutse gutangaza ko mu Ugushyingo 2016 ari bwo uyu muririmbyi yatangiye kugirana umubano udasanzwe n’umusore witwa Sam Asghari yakoresheje mu mashusho y’indirimbo yitwa ’Slumber Party’ aherutse gusohora.

Kuva icyo gihe Britney Spears ntahwema gushyira amafoto ye na Sam Asghari ku mbuga nkoranyamaga bari kumwe mu bihe byiza.

Sam Asghari bivugwa ko yigaruriye umutima wa Britney Spears kuva bamenyana asanzwe ari umunyamideli ubikora mu buryo bw’umwuga, yagiye yifashishwa mu mashusho y’indirimbo zizwi muri USA zirimo iyitwa ’Work From Home’ y’itsinda Fifth Harmony n’izindi.

Britney Spears asanzwe afite abana babiri b’abahungu yabyaranye na Kevin Federline, umukuru yitwa Sean [afite imyaka 10] naho umuto w’umuhererezi akitwa Jayden [afite imyaka 9].

Uyu mugore amaze gushinga urugo inshuro ebyiri, bwa mbere yabanje kuba umugore wa Jason Allen Alexander gusa bamaranye amasaha 55 gusa, nyuma aba umugore wa Kevin Federline babanye kuva muri 2004 kugeza mu 2007.

Ku isabukuru y'amavuko ya Sam Asghari, Britney yamugaragarije ko amwishimiye cyane
Britney Spears n'umukunzi arusha imyaka 12 y'amavuko

Reba Slumber Party ya Britney Spears na Tinashe


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza