Chris Brown agiye gusohora filime ivuga ku bizazane yanyuzemo

Yanditswe na Dusabimana Aimable
Kuya 21 Mata 2017 saa 04:16
Yasuwe :
0 0

Umuririmbyi Chris Brown yatangaje ko agiye gusohora filime mbarankuru ivuga ku buzima bwe bwaranzwe no kuba icyamamare akiri muto bigatuma yishora mu rugomo n’ibikorwa bigayitse byakunze kumukurira ibizazane mu buzima bwe.

Christopher Maurice "Chris" Brown ni umwe mu bahanzi bo muri Leta Zunze Ubumwe za Amerika bamaze igihe bakunzwe cyane mu muziki. Yaririmbye indirimbo zakunzwe nk’iyitwa ’Gimme That’, ’With You’, ’Kiss Kiss’, ’No Air’ n’izindi. Muri iki gihe hagezweho iyitwa ’Privacy’ itavugwaho rumwe bitewe n’amagambo y’urukozasoni ayirimo.

Uyu muhanzi abinyujije ku rubuga rwa Instagram yatangaje ko muri Kamena 2017 ari bwo azashyira ahagaragara filime mbarankuru yise ’Welcome to my life’ igaruka ku byo yanyuzemo mu buzima bwe nk’umuhanzi ndetse n’ibizazane yagiye ahura nabyo biturutse ku bikorwa by’urugomo byagiye bimuranga.

Mu gace gato Chris Brown yasohoye mu mpera z’umwaka ushize kavuga kuri iyi filime, hari aho yumvikana agira ati "Niyumvaga nk’inyamaswa, natekerezaga kwiyahura n’ibindi. Ntabwo nari nkigoheka, ntabwo nari ngishyira uturaso ku mubiri, nari nsigaye niyumva nk’uw’ikirenga."

Akomeza agira ati "Nko mu buzima bw’ibyamamare bidasanzwe, byari nk’inkuru mpimbano. Navuye ku gasongero k’Isi. Ufite indirimbo za mbere, ukunzwe n’Abanyamerika, ngera ku rwego rwo kuba umwanzi ukomeye wa rubanda. Niba warajyaga wibaza ko ibya Chris Brown byarangiye, yari yararangiye. Ntabwo nari kukuburanya."

Muri aka gace kagufi k’umusogongero w’iyi filime Chris Brown yise ’Welcome to my Life’, hari ahumvikanamo amwe mu magambo yakunze gusubiza agitangira umuziki ubwo yabaga abajijwe urwego yifuza kuzageraho, agira ati "Ndashaka kugera kure, ku gasongero, aho nzajya mvugwa nk’umunyabigwi, cyangwa hafi aho."

Iyi filime mbarankuru ku buzima bwa Chris Brown izanagaragaramo abandi bahanzi bakomeye bamuvugaho barimo Jamie Foxx, Usher, DJ Khaled, Jennifer Lopez, ndetse na Rita Ora.

Chris Brown ugiye gusohora filime ivuga ku byaranze ubuzima bwe nk’icyamamare, yakunze kugirana ibibazo by’ubushyamirane n’abantu batandukanye, abo azi n’abo atazi barimo n’abafana be. Muri 2009 yahamijwe icyaha cyo gukomeretsa Rihanna bakundanaga akamusigira ibikomere mu isura.

Chris Brown agiye gusohora filime imuvugaho

Mu bihe bitandukanye yahiye afungwa bya hato na hato azira ibyaha byiganjemo iby’urugomo, guhohotera abagore abakubita, kunywa ibiyobyabwenge bibujijwe. Muri 2013 hari ubwo yijyanye mu kigo ngororamuco ngo asubize ubwenge ku gihe, aza kuhirukanwa nabwo azira gukorera ibikorwa by’urugomo abo yahasanze.

Ibi byose n’ibindi bibazo uyu muhanzi yagiye ahura na byo mu buzima bwe nk’icyamamare nibyo bizagaragara muri iyi filime mbarankuru byitezwe ko izajya ahagaraga mu mezi abiri ari imbere.

Chris Brown atangaje igihe filime ’Welcome to my life’ izajya ahagaragara nyuma y’uko mu minsi ishize yari yavuzweho kongera kugaragara mu bikorwa by’urugomo no kurwana aho yakubise ibipfunsi gafotozi mu kabyiniro yari yatumiwemo akamukomeretsa ku munwa.

Uyu musore yigeze gukubita Rihanna amugira intere
Chris Brown amaze iminsi avugwa mu bibazo bya gafotozi yakubise akamuca umunwa
Chris Brown yakunze gufungwa bya hato na hato aryozwa azira ibikorwa by'urugomo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza