Chris Brown ashobora kugezwa mu nkiko azira gukubita gafotozi akamuca umunwa

Yanditswe na Dusabimana Aimable
Kuya 18 Mata 2017 saa 02:53
Yasuwe :
0 0

Umuririmbyi Christopher Maurice "Chris" Brown ari gukorwaho iperereza na Polisi yo muri Leta ya Florida nyuma y’uko umufotozi wari wahawe akazi mu gitaramo cye avuze ko yamukubise ingumi amuziza amaherere.

Ni nyuma y’ibirori uyu muhanzi yari yishyuriwe kugaragaramo mu ntangiriro z’iki cyumweru mu kabyiniro kitwa Aja Channelside kari ahitwa Tampa muri Leta ya Florida. Umwe mu basore bari bahawe akazi ko gufotora muri iki gitaramo witwa Bennie Vines Jr. arashinja uyu muhanzi kuhamubitira ibipfunsi nta mpamvu ifatika amuziza.

Ikinyamakuru TMZ cyatangaje ko ubuyobozi bw’aka kabyiniro bwatangaje ko uyu musore ufotora yari ahari mu gicuku cyo ku wa Mbere tariki ya 17 Mata 2017 ahagana saa saba n’igice, ubwo Chris Brown n’abamuherekeza bari bahageze, ngo yagerageje kubafotora nk’umurimo yishyuriwe ariko abarinzi b’uyu muhanzi bamwigizayo.

Nyuma Chris Brown yinjiye ahabereye ibirori uyu musore agerageza gufata amafoto y’abitabiriye amuturutse inyuma, undi abimenye aramusimbukira n’uburakari bwinshi amukubita ibipfunsi mu maso aramukomeretsa. Nyuma y’iki gikorwa uyu muhanzi yakoze, amashusho amugaragaza akubita uyu gafotozi yacicikanye ku mbuga nkoranyambaga zitandukanye nyuma yo gushyirwa ahagaragara n’iki kinyamakuru.

Muri aya mashusho yafashwe n’umwe mu bari ahabereye ibi, Chris Brown agaragara yambaye imyenda itukura, umurinzi we ni uwambaye umuhondo naho gafotozi wakubiswe ni uri mu nguni ahijimye. Uyu musore ufotora mu kabyiniro, akimara gukubitwa ngo Polisi yo muri uyu Mujyi wa Tampa yaratabajwe ariko ihagera Chris Brown n’abandi bari kumwe bamaze kuhava.

Bennie Vines Jr. ushinja Chris Brown kumukoreraho urugomo no kumukomeretsa yavuze ko ateganya kumurega mu nkiko akaba yakurakiranwa kugira ngo abiryozwe.

Chris Brown watangiye no gukorwaho iperereza na Polisi yo mu Mujyi wa Tampa muri Leta ya Florida, yari aherutse kwihanangirizwa kutagera ahari Karrueche Tran bahoze bakundana nyuma y’uko amuteye ubwoba avuga ko azamwica. Ibi yanabibwiye undi musore w’inshuti isanzwe y’uyu mukobwa.

Uyu muhanzi ni umwe mu bakunze kugirana ibibazo n’ubushyamirane n’abantu batandukanye, abo atazi n’abo baziranye. Muri 2009 yahamijwe ibyaha byo gukomeretsa no guhohotera Rihanna bahoze bakundana akamusigira ibikomere mu isura.

Uyu muhanzi ni umwe mu bakunze kugirana ibibazo n'ubushyamirane n'abantu batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244