David Beckham n’umugore we bagiye kugura inzu y’akataraboneka i Los Angeles

Yanditswe na Dusabimana Aimable
Kuya 12 Ukuboza 2016 saa 12:58
Yasuwe :
0 0

David Beckham wabaye ikirangirire mu mupira w’amaguru n’umugore we Victoria Beckham wamenyekanye aririmba mu itsinda Spice Girls bagiye kugura inzu ihenze mu Mujyi wa Los Angeles.

Ikinyamakuru Daily Star cyo mu Bwongereza kivuga ko ibi byamamare byatangiye kurambagiza inzu ihagaze akayabo ka miliyoni 200 z’amadolari, iyi nzu iherereye ahitwa Holbymy Hills mu Mujyi wa Los Angeles aho bari basanzwe bafite indi nayo ihenze.

Bivugwa ko bamaze gushyira ku isoko inzu baherukaga kugura nayo iri mu Mujyi wa Los Angeles, gusa ayo makuru agahakanwa n’umuvugizi wabo unavuga ko nta gahunda bafite yo kwimuka nubwo hari andi makuru yemeza ko batangiye gushaka uburyo bagura indi nzu ikwirwamo umuryango wose.

Umwe mu bantu begeranye cyane n’abagurisha iyi nzu ihabwa akabyiniriro ka ’The Manor’ Beckham n’umugore bagiye kugura, yavuze ko bombi bamaze kuyishima ndetse ifite ibyo bifuza byose.

Ati "The Manor ifite buri kimwe ba Beckham bari gushaka. Victoria na David ni abantu b’ibyamamare, ntibashaka kuba aho babonwa kandi hano ho bitandukanye n’ibyo cyane". Yongeyeho ko Victoria yishimiye iyi nzu by’ikirenga kuko "imwibutsa iyitwa ’Beckingham Palace’ bigeze guturamo.

"Barifuza kubaho mu mutekano usesuye, kandi iteka ikibazo cy’ibanze kiba umutekano [...] David na Victoria banazi neza ko ibyo abana babo bakeneraga mu nzu byamaze guhinduka burundu nyuma y’imyaka icumi ishize, iyo nayo ni imwe mu mpamvu z’ingenzi zigiye gutuma bimuka."

Si ubwa mbere Davide Beckham n’umugore we bagiye kugura inzu ihenze cyane kuko bakimara kurushinga bahise bagura iyitwa Rowneybury House mu Bwongereza, ikaza guhabwa izina Beckingham Palace, bayigurishije muri 2012.

Muri iki gihe baba mu Bwongereza aho bafite indi nzu ihenze mu Burengerazuba bw’umurwa mukuru w’iki gihugu ahitwa Polland Park, bayibanamo n’abana babyaranye. Uyu muryango w’ibyamamare unafite indi nzu y’agaciro mu Mujyi wa Los Angeles bajya guturamo mu gihe cy’ibiruhuko.

Aba bombi barushinze mu 1999, bamaze kubyarana abana bane barimo uwitwa Brooklyn w’imyaka 17, Romeo, 13, Cruz, 11, na Harper w’itanu. Beckham n’umugore we ni bamwe mu bantu b’ibyamamare batunze agatubutse kuko bombi babarirwa imitungo ihagaze akayabo ka miliyoni zirenga 770 z’Amadolari ya Amerika.

Inzu nshya bashaka kugura irahebuje
Beckham n'umugore we bahoze batuye mu nzu yitwa Beckingham Palace

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza