Diamond yasobanuye icyatumye ahatwa ibibazo na Polisi ya Tanzania

Yanditswe na IGIHE
Kuya 16 Gashyantare 2017 saa 09:45
Yasuwe : XX
0

Umuririmbyi ukomeye muri Tanzania amaze iminsi ibiri yitaba Polisi ku cyaha yakoze gifitanye isano no kwica amategeko y’umuhanda mu gihe bamwe bari batangiye guhwihwisa ko ari gukorwaho iperereza ku icuruzwa ry’ibiyobyabwenge.

Ku mugoroba wo kuri uyu wa Gatatu tariki ya 15 Gashyantare 2017 nibwo amafoto ya Diamond yicaye mu cyumba cy’ibazwa cya polisi ya Tanzania yatangiye gucicikana ku mbuga nkoranyambaga ndetse bimwe mu bitangazamakuru bitangira gutangaza ko uyu muhanzi agiye gufungwa kubera gucuruza no gukwirakwiza ibiyobyabwenge.

Diamond yaje kwisobanura binyuze kuri Instagram avuga ko yahamagajwe n’inzego zishinzwe kugenza ibyaha bifitanye isano no kuvogera amategeko y’umuhanda ndetse ngo yaciwe amande ku bw’amakosa na we ubwe yiyemerera.

Mu minsi mike ishize Diamond yashyize kuri Instagram amashusho yamugaragazaga atwaye imodoka nta mukandara w’umutekano w’abashoferi yambaye ndetse muri iyi video yacishagamo akarekura imodoka ikiyobora. Iyi video yasakajwe ku mbuga nkoranyambaga polisi ya Tanzania iyibonye ihita itumiza uyu muhanzi ngo aze yisobanure.

Nyuma yo guhabwa ibibazo no gucibwa amande, Diamond yanditse agira ati “Uyu munsi nagiye ku cyicaro gikuru cya Polisi ishinzwe umutekano wo mu muhanda kubera amashusho nafashe ntwaye imodoka nta mukandara nambaye […] Bafana nshuti zanjye mucyo twite cyane ku mutekano wacu twambare umukandara mu gihe cyose dutwaye imodoka.”

Diamond yatumijwe kuri Polisi nyuma y’iminsi mike akoze ibirori byo kwerekana umwana we wa kabiri aherutse kwibaruka akanatangaza ko agiye gukorana ubukwe bw’igitangaza n’umugore we Zari.

Uyu muhanzi kandi ari mu bamaze iminsi bakorwaho iperereza na polisi ya Tanzania, akurikiranyweho gucuruza no gukoresha ibiyobyabwenge. Diamond ari mu cyiciro kimwe na Wema Sepetu [wari umaze iminsi afunzwe], TID, Mr Blue n’abandi batandukanye.

Nyuma yo gucibwa amande Diamond yabonanye n'ubuyobozi bukuru bwa Polisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza