Diamond yavugirijwe induru n’abafana muri Uganda bamwishyuza Zari

Yanditswe na IGIHE
Kuya 7 Ukwakira 2017 saa 01:46
Yasuwe :
0 0

Diamond Platnumz yagiye gukorera igitaramo mu Mujyi wa Kampala mu mpera z’iki cyumweru, yatunguye benshi ubwo yageraga ku kibuga cy’indege cya Entebbe adaherekejwe n’umugore we nk’uko byagendaga mu bihe byashize.

Diamond ukunzwe mu ndirimbo ‘Eneka’ n’indi nshya aheruka gukorana na Morgan Heritage yitwa ‘Hallelujah’. Iyi ndirimbo ‘Hallelujah’ iri mu za Diamond zaciye agahigo muri iyi minsi kuko mu minsi irindwi ishize yarebwe n’abasaga miliyoni 3.5.

Uretse ibibazo Diamond afitanye n’umugore we Zari Hassan, igitaramo yakoreye i Kampala mu ijoro ryo kuri uyu 6 Ukwakira 2017 cyari ibyishimo bikomeye ku bakunzi be gusa byaje kuba ikibazo ubwo yari atangiye kuvuga ko ‘muri Uganda yahabonye abakobwa beza’ maze bose bamusamira hejuru bamusaba ko ababwiza ukuri ku bye na Zari.

Igitaramo kigezemo hagati, abafana bacecekesheje Diamond bazamura amajwi yiganjemo amubaza ngo “Zari wamushyize he?, tubwize ukuri?, ibyawe na Zari bimeze bite?”. Diamond yamaze umwanya acecetse abonye abafana bakamejeje yanzika n’igitaramo adasubije ibibazo byabo.

Diamond yagiye kuririmbira muri Uganda ku butumire bw’Umujyi wa Kampala ari nawo utegura ibirori ngarukamwaka bya Kampala City Festival. Yaririmbiye ahitwa Kololo Independence Grounds, Kampala, ahari hateraniye abafana ibihumbi.

Mu minsi mike ishize ibibazo byakajije umurego hagati ya Zari na Diamond biturutse ku bana uyu muhanzi amaze iminsi abyara hanze. Ibya Diamond n’aba bagore yabyaranye na bo Zari yagererageje kwitandukanya na byo ndetse ntiyongera kugaragara na rimwe ari kumwe n’umugabo we ahubwo akavuga ko ikimuhangayikishije kurusha ibindi ari ukwita ku bikorwa by’ubucuruzi bwe kuruta kurwanira umugabo.

Mu kugaragaza akababaro ke, Zari yahanaguye amafoto arenga ibihumbi bibiri ku rubuga rwe rwa Instagram yiganjemo aya Diamond, yavuze ko atazongera kwizera abantu ku mbuga nkoranyambaga batuma agaragara ’nk’udafite ubwenge.’

Ntabwo ari Zari gusa wasibye amafoto muri ubwo buryo kuko na Diamond yahise asiba ayo ku rukuta rwe rwa Instagram yahuriragamo na Zari.

Muri iki gihe Zari yajyanye abana be na Diamond ndetse anasiba izina ry’uyu muhanzi ku mbuga nkoranyambaga zabo zikurikirwa cyane.

Ibyagaragaye nk’uburakari aba bombi bafitanye byatumye banahagarika gukurikirana ku mbuga nkoranyambaga mu buryo bwafashwe nko gushaka kwiyibagiza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza