Icyamamare Debbie Reynolds n’umwana we bitabye Imana mu buryo bw’inkurikirane

Yanditswe na Dusabimana Aimable
Kuya 29 Ukuboza 2016 saa 08:26
Yasuwe :
0 0

Umukinnyi w’icyamamare muri sinema, Debbie Reynolds, yitabye Imana nyuma y’umunsi umwe gusa umwana we, Carrie Fisher, na we ahitanwe n’indwara y’umutima.

Debbie Reynolds yamenyekanye muri filime yitwa Singin’ in the Rain yasohotse mu 1952, yatangiye kwamamara afite imyaka 19 gusa. Yari umwe mu bubashywe muri Leta Zunze Ubumwe za Amerika bamaze igihe kirekire mu mwuga wo gukina sinema. Yakunze kwibanda ku gukina muri film z’urwenya n’iz’ivuga ku muziki.

Umunsi umwe mbere y’urupfu rwa Debbie Reynolds rwatunguranye habanje urw’umwana we, Carrie Fisher, wishwe n’indwara y’umutima nyuma y’icyumweru akurikiranwa n’abaganga ntibigire icyo bitanga.

Ikinyamakuru TMZ cyatangaje ko Debbie Reynolds yaguye amarabira mu gihe yavugaga ku rupfu rw’umwana we Carrie Fisher avuga ko ’yatangiye kumukumbura, ashaka kuguma iruhande rwe’.

Iki kinyamakuru cyakomeje kivuga ko Debbie Reynolds yakunze gufatwa n’indwara y’umutima mu buryo budakomeye muri uyu mwaka, abo mu muryango we bo bavuga ko urupfu rw’umukobwa we kurwakira byamugoye cyane bishoboka ko ari nayo ntandaro y’uguhagarara k’umutima we.

Nyuma y’aho umutima uhagarariye Reynolds yahise ashyirwa mu mbangukiragutabara ajyanwa igitaraganya ku bitaro bya Cedars-Sinai Medical Centre biherereye mu Mujyi wa Los Angeles, urupfu rwe rwemejwe nyuma y’akanya gato akurikiranwa n’abaganga ntibigire icyo bitanga.

Reynolds asize umwana umwe witwa Todd Fisher wakurikiraga Carrie Fisher witabye Imana umunsi umwe mbere y’urupfu rw’umubyeyi wabo. Carrie Fisher we yari asanzwe azwi cyane muri filime z’uruhererekane za Star Wars.

Carrie Fisher na nyina bitabye Imana mu buryo bw'inkurikirane
Carrie Fisher we yamamaye cyane muri Star Wars
Debbie Reynolds yari umwe mu bubashywe cyane i Hollywood

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza