Inkuru zivuga ko Britney Spears yitabye Imana zaciye igikuba

Yanditswe na Dusabimana Aimable
Kuya 27 Ukuboza 2016 saa 09:07
Yasuwe :
0 0

Umunsi wakurikiye Noheli ku rubuga rwa Twitter rw’ikigo cya Sony Music hatambutseho amakuru yavugaga ko umuririmbyi w’icyamamare ku Isi mu njyana ya Pop, Britney Spears yaguye mu mpanuka.

Aya makuru yahangayikishije benshi mu bakunzi b’uyu muririmbyi ukomeye ku Isi, akwirakwira mu buryo bwihuse. Nyuma y’akanya iyi nkuru yashyize benshi mu gihirahiro itambutse, abasanzwe bakurikirana bya hafi konti ya Sony Music bahise basiba ibyari byanditswe.

Mu gihe kimwe n’icyo Sony Music yatangarijeho aya makuru, undi muririmbyi ukomeye muri Leta Zunze Ubumwe za Amerika witwa Bob Dylan na we yari yanditse kuri Twitter ye yifuriza iruhuko ridashira mugenzi we Britney Spears.

Umuvugizi wa Britney Spears witwa Adam Leber yavuze ko izi nkuru zaciye igikuba ari impimbano ndetse yemerera CNN ko uyu muhanzi ameze neza nta kibazo na kimwe afite.

Ati "Njye ndibwira ko konti yabo ishobora kuba yinjiriwe, nta muntu wabo twavuganye gusa ndabyemeza nemye konti yabo yinjiriwe. Britney ameze neza kandi cyane."

Ibinyamakuru bikomeye birimo Mirror Online cyo mu Bwongereza byari byatangaje ko uyu muririmbyi yapfuye hagendewe ku makuru yatangajwe na Sony Music. Agatsiko k’abantu batazwi biyita ’OurMine’ katangaje ko aribo bihishe inyuma y’iki gikorwa cyo gutangaza urupfu rwa Britney Spears.

Sony Music na yo yaje kwemeza ko konti bakoresha kuri Twitter yari yinjiriwe n’abandi bantu bongeraho ko ’ibintu byose byasubiye mu buryo’, banasabye imbabazi Britney Spears n’abafana be byari byashyize mu rujijo.

Britney Spears w’imyaka 35 yakunzwe bikomeye mu ndirimbo zirimo ’I’m a Slave 4 U’, ’Gimme More’, ’Pretty Girls’, ’Womanizer’ n’izindi. Muri iki gihe aharawe mu yitwa ’Make Me’ aherutse gukorana n’umuraperi uri kwigaragaza muri USA witwa G-Eazy.

Ku rubuga rwa Sony Music niho habanje gutangazwa iyi nkuru
Bob Dylan na we yari yanditse kuri Twitter ye yifuriza iruhuko ridashira Britney Spears.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza