Inzu ya Michael Jackson yagabanyirijwe igiciro nyuma y’imyaka ibiri yarabuze umuguzi

Yanditswe na Dusabimana Aimable
Kuya 3 Werurwe 2017 saa 05:21
Yasuwe :
1 0

Inzu ihenze yahoze ituwemo na nyakwigendera Michael Jackson yasubijwe ku isoko igabanyirizwa igiciro nyuma yo kumara imyaka ibiri yarabuze uyitangaho akayabo kifuzwaga.

Ni inzu izwi cyane nka ‘Neverland Ranch’, Michael Jackson yayiguze mu 1987, icyo gihe yishyuye miliyoni 19.5 z’amadolari. Iyi nzu ifite ubusitani bwagutse cyane, ifite ibibuga byo gukiniraho umupira [Tennis, ruhago, basketball] n’indi mikino inyuranye.

Ibiro Ntaramakuru by’Abanyamerika, AP, byatangaje ko iyi nzu iri ahitwa Santa Barbara mu Mujyi wa Calfornia yongeye gusubizwa ku isoko ikagabanyirizwa igiciro kuva kuri miliyoni 100 z’amadorali yari ihagazeho mu mwaka ushize n’uwa 2015 kugeza kuri miliyoni 67 z’amadorali.

Michael Jackson yabaye muri ’Neverland Ranch’ kugeza mu 2005 ubwo yasakagwa na Polisi biturutse ku birego by’umwana yashinjwaga guhohotera. Iyi nzu yongeye kugarukwaho cyane muri 2008 ubwo uyu muririmbyi yananirwaga kwishyura imyenda yari arimo icyo gihe hagasabwa ko yatezwa cyamunara.

Ikigo cy’ubucuruzi cyitwa Colony Capital cyaguze iyi nzu na nyakwigendera Michael Jackson muri 2009 mbere y’uko yitaba Imana, yatanzweho miliyoni 22.5 z’amadorali.

Ikinyamakuru Forbes gikurikiranira hafi ibijyanye n’imitungo y’ibikomerezwa ku Isi cyigeze gutangaza ko ba nyiri Colony Capital batanze akayabo k’amadorali arenga miliyoni 50 kuri iyi nzu mu bikorwa byo kuyisana no kuyivugurura ndetse no kwita ku isuku yayo.

Muri uyu mwaka, iyi nzu iragurishwa n’umwe mu ba komisiyoneri bakomeye bo mu Mujyi wa Los Angeles witwa Joyce Rey. Muri 2015 yari yashyizwe ku isoko ihagaze akayabo ka miliyoni 100 z’amadorali, kugeza n’ubu yari itarabona umuguzi biri no mu byatumye hafatwa icyemezo cyo kugabanya igiciro igurishirizwaho.

Iyi nzu yashyizwe ku isoko ku madolari miliyoni 67

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza