Kwamamaza

Jay Z na Beyonce bakoze igitaramo nk’abarwanashyaka ba Hillary Clinton (Amafoto)

Yanditswe kuya 5-11-2016 saa 11:29' na IGIHE


Shawn Corey Carter[Jay Z] n’umugore we Beyonce baherekeje Hillary Clinton mu Mujyi wa Cleveland mu bikorwa byo gushakisha amajwi ku mwanya w’Umukuru w’Igihugu ahatanira na Donald Trump.

Jay Z na Beyonce bakoze igitaramo gikomeye mu ijoro ryo kuri uyu wa 4 Ugushyingo 2016, cyabereye mu Mujyi wa Cleveland muri Leta ya Ohio. Daily Mail yatangaje iki gitaramo kiri mu bifite imbaraga byateguriwe kwamamaza Hillary Clinton.

Si uwa mbere Jay Z ashyigikiye umukandida mu matora kuko no muri 2009 ndetse na 2012 yakoraga ubukangurambaga mu gushakira Barack Obama amajwi. Uyu muraperi ni umwe mu bandi bahanzi bakomeye bazafasha Hillary Clinton mu kwiyamamaza.

Umugore wa Jay Z, Beyonce Knowles na we ashyigikiye Hillary Clinton ndetse no mu mwaka ushize wa 2015 yamuherekeje i New York City mu bikorwa byo gukusanya inkunga yo kumufasha kwiyamamaza.

Hillary Clinton yavuye muri Cleveland abaturage bamwishimiye cyane ndetse bagaragaje umurindi ukomeye ubwo Beyonce yageraga ku rubyiniro aherekejwe n’itsinda ry’ababyinnyi be. Jay Z yafashije umugore we kuririmba ndetse mu byo bavuze bibandaga cyane kwibutsa abaturage kuzatora Clinton.

Beyonce yaririmbye indirimbo ze zakunzwe zirimo ‘Independent Women’, ‘Run the World’ n’izindi yafatanyije n’umugabo we Jay Z. Aba bombi baririmbaga inyuma yabo hamanitse icyapa cyanditseho imvugo Clinton akoresha yiyamamaza ‘Stronger Together’.

Mbere y’uko Clinton agera ku rubyiniriro, Jay Z yafashe ijambo avuga ko atifuza na rimwe kuyoborwa na Donald Trump kuko arangajwe imbere no gutanya abantu aho kubabanisha.

Yashimangiye amagambo yari yavuzwe n’umugore we, Beyonce Knowles, ko bifuza ko umukobwa wabo akurira mu gihugu kiyoborwa n’umugore. Beyonce yanagarutse ku byishimo yatewe no kuba Amerika mu myaka umunani ishize yayoborwaga n’umwirabure bityo ko yifuza kubona impinduka umugore nawe akaba Perezida wa Leta Zunze Ubumwe za Amerika.

Jay Z n'umugore we Beyonce bashyigikiye Clinton

Abandi bahanzi barimo Big Sean na Chance the Rapper na bo baririmbye muri iki gitaramo cyo gushakira amajwi Hillary Clinton watashye afite icyizere ko ibyo amaze iminsi aharanira ashobora kubigeraho.

Mu gihe iki gitaramo cyabaga, Donald Trump na we yari yagiye gukoresha ibirori byo gushaka amajwi muri Pennsylvania. Yibasiye Clinton avuga ko ‘adakoresha imbaraga z’abahanzi mu kumvisha abaturage ko bakwiye kumutora’.

Yagize ati “Ndi hano ubwanjye […] Nta gitari mfite, nta piano, nta kintu na kimwe mfite.” Clinton afite abandi bahanzi benshi bamushyigikira barimo Miley Cyrus, Katy Perry, John Legend n’abandi.

Hillary Clinton azasubira kwiyamamaza muri Cleveland ku Cyumweru tariki ya 6 Ugushyingo 2016, ntazaherekezwa n’abaririmbyi ahubwo ngo kuri iyi nshuro yahisemo kuzajyana na ’King’ LeBron James.

Jay Z na Beyonce babanje kuganira na Clinton mbere y'igitaramo
Uko ari batatu babanje gutera urwenya baraseka
Hillary Clinton yashimiye Beyonce wamufashije gushaka amajwi
Jay Z mu gitaramo cyo gushyigikira Clinton

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved