Jennifer Lopez yabonye undi mukunzi nyuma yo gutandukana na Drake bidateye kabiri

Yanditswe na Dusabimana Aimable
Kuya 9 Werurwe 2017 saa 05:13
Yasuwe :
0 0

Umuririmbyi Jennifer Lynn Lopez aravugwaho kugirana umubano wihariye n’undi mugabo nyuma yo gutandukana n’umuraperi Drake bari bamaranye iminsi mu munyenga w’urukundo.

Jeniffer Lopez azwi cyane nk’umuririmbyi, umukinnyi wa filime, umuhanzi w’imideli, yanakoze ibiganiro bitandukanye kuri televiziyo zikomeye muri Leta Zunze Ubumwe za Amerika. Mu buzima bwe nk’icyamamare yakunze kuvugwaho gukundana n’abagabo benshi.

Ikinyamakuru New York Daily News cyatangaje ko uyu mugore wamamaye ku Isi, muri iki gihe afitanye umubano wihariye n’umukinnyi wa Baseball witwa Alex Rodriguez, batangiye gusohokana ahantu hatandukanye kuva mu mezi ane ashize.

Uyu mugabo ukina Baseball muri Leta Zunze Ubumwe za Amerika aherutse no kwitabira kimwe mu bitaramo bya Jennifer Lopez cyabereye i Las Vegas ndetse agaragara no mu rwambariro rw’uyu muririmbyi n’ababyinnyi be.

Alex Rodriguez w’imyaka 41 uvugwaho kugirana umubano wihariye na Jeniffer Lopez mu buryo batarashyira ku mugaragaro, asanzwe afite urugo mu Mujyi wa Miami n’abana babiri yabyaranye n’umugore witwa Cynthia batandukanye amushinja kumuca inyuma akaryamana n’umuhanzi Madonna.

Uyu mugabo yanakundanye n’ibindi byamamare bitandukanye mu muziki birimo uwitwa Torrie Wilson, Cameron Diaz na Kate Hudson. Hari hashize umwaka umwe Alex Rodriguez ari mu rukundo n’umugore w’umuherwe witwa Anne Wojcicki, bemeje itandukana ryabo mu byumweru bibiri bishize.

Jennifer Lopez aherutse gucana umubano na Drake bidaciye kabiri

Jeniffer Lopez watangiye kugirana ibihe byiza n’uyu mukinnyi wabaye icyamamare muri Baseball muri Leta Zunze Ubumwe za Amerika, yaherukaga kuvugwa mu rukundo n’umuraperi Drake bacanye umubano nyuma y’inkuru za TMZ zasohotse zivuga ko umusore yabengutse umunyamideli w’Umufaransakazi witwa Rosee Divine, hari n’amakuru avuga ko yongeye gucudika na Rihanna ndetse na Nicki Minaj.

Jeniffer Lopez yakunze gushakana n’abagabo benshi. Mu 1997 yashakanye byemewe n’amategeko n’uwitwa Ojani Noa batandukana mu mwaka wakurikiyeho, muri 2001 yahise arushinga n’uwitwa Cris Judd batandukana hashize imyaka ibiri, nyuma y’aba bagabo babiri batigeze barambana, muri 2004 Jennifer Lopez yahise arushinga n’umuririmbyi Marc Anthony, muri 2012 basabye gatanya iza kwemerwa muri 2014.

Alex Rodriguez aherutse kugaragara yaherekeje Lopez mu gitaramo cye
Alex Rodriguez n'umugore w'umuherwe batandukanye
Alex Rodriguez yanakundanye n'icyamamare muri sinema Cameron Diaz
Jeniffer Lopez ni umwe mu bahanzikazi bashakanye n'abagabo benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza