Kwamamaza

Justin Bieber agiye kujyanwa mu nkiko n’umufana yaciye umunwa

Yanditswe kuya 28-11-2016 saa 15:12' na Dusabimana Aimable


Umuhanzi Justin Bieber agiye kujyanwa mu nkiko n’umufana yakubise akamukomeretsa umunwa ubwo yari i Barcelona aho yakoreye igitaramo gikomeye mu ijoro ryo kuwa 22 Ugushyingo 2016.

Ni mu rugendo rw’ibitaramo Justin Bieber yise "Purpose Tour" bizenguruka imigabane n’ibihugu bitandukanye hirya no hino ku Isi. Nyuma y’igitaramo uyu muririmbyi yakoreye kuri Stade Palau Sant Jordi muri Espagne hasakaye amashusho amugaragaza akubita umwe mu bafana be wagerageje kumukoraho anyujije ukuboko mu idirishya ry’imodoka ye.

Uyu mufana witwa Kevin Ramirez yaviriranye cyane ku munwa nyuma yo gukomeretswa na Justin Bieber wamukubise ingumi mu isura hakavuka imvururu zatumye umushoferi wa Justin Bieber akandagira umuriro bakahava shishi itabona.

Kevin Ramirez wakomerekejwe na Justin Bieber yabwiye imwe muri Radio zo muri Espagne ko yiteguye kugeza ikirego cye mu nkiko cyane ko yanamaze kugishyikiriza abanyamategeko bazamufasha kugaragaza akarengane n’ihohoterwa yakorewe n’uyu muririmbyi w’icyamamare ku Isi.

Kevin Ramirez ushinja Justin Bieber kumukorera urugomo, avuga ko ajya kunyuza ukuboko mu idirishya ry’imodoka y’uyu muhanzi yari agambiriye “gukora ku ntugu n’isura by’uyu muhanzi” asanzwe afata nk’icyitegererezo. Ku mbuga nkoranyambaga z’uyu mufana wakomerekejwe na Justin Bieber hagaragaraho amafoto amugaragaza yambaye imyenda yanditseho amazina y’uyu muhanzi.

Uyu mufana wakomerekejwe na Justin Bieber yasobanuye ko yababajwe bikomeye n’ibyo uyu muhanzi yamukoreye cyane ko yashoboraga kuba yakoresha ubundi buryo atamukubise ngo amukometse.

Yagize ati “Ntabwo nari nabitekerejeho n’umwanya muto ko Justin yari kunkubita ingumi”, yongeyeho ko nubwo ari umufana ukomeye w’uyu muhanzi atabashije gukurikirana igitaramo yakoreye mu Mujyi wa Barcelona aho yamukubitiye.

Hashize iminsi Justin Bieber atameranye n’abafana be muri rusange, aho abenshi bamushinja ubwirasi nyuma y’ibikorwa bitandukanye agenda akora ntibabyakire neza. Muri Gicurasi uyu mwaka nibwo Justin Bieber yavuze ko atifuza abafana bamwifotorezaho cyane bituma yiyumva “nk’inyamaswa yo muri pariki”.

Muri ibi bitaramo ari gukorera i Burayi, Justin Bieber yagiye avugwaho inkuru z’ibibazo n’umwiryane n’abafana; mu byumweru bishize yabwiye abafana be i Londres ko ‘bakwiye guceceka bakamutega amatwi igihe arimo kuvuga’, ab’i Manchester na bo yarababwiye ngo ‘baceceke’ bibabaza benshi babifashe nko kubasuzugura.

Ubwo yari yagiye kuririmbira muri Prague, umufana yacunze Justin Bieber afata ipantaro ashaka kuyimanura ngo amwambike ubusa gusa abamucungira umutekano bahise batabara.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved