Justin Bieber yatangiye kwigisha inshuti ze ibijyanye kugandukira Imana

Yanditswe na Munyengabe Murungi Sabin
Kuya 13 Ukuboza 2016 saa 08:46
Yasuwe : XX
0

Umuririmbyi Justin Bieber yatangiye kwigisha inshuti ze za hafi n’abo mu muryango amasomo yerekeranye no kugandukira Imana nyuma y’iminsi yikuye ku rubuga rwa Instagram arushinja kuba ikuzimu.

Justin Bieber w’imyaka 22 y’amavuko azwi cyane mu ndirimbo nka ’Never Say Never’ yakoranye n’umuhungu wa Will Smith, iyitwa ’Baby’ yakoranye na Ludacris, ’One Time’ yatumye amenyekana n’izindi nyinshi.

Uyu musore wakunze kuvugwaho ibikorwa by’urugomo mu minsi yashize, inshuti ze za hafi zatangiye kuvuga ko asigaye yitwararika mu buryo budasanzwe ndetse akaba amaze iminsi agerageza kwihugura no guhugura bagenzi ku bijyanye n’amasomo yo muri Bibiliya.

Kuva yaba icyamamare muri 2009, Justin Bieber yakunze kugaruka ku myemerere ye, ibintu bidakunze gukorwa n’ibindi byamamare. Yakunze kuvuga ko ari umukirisitu gusa akibasirwa na benshi ku bw’ibyo yahoraga avugwaho birimo gukubita abafana, kunywa ibiyobyabwenge, ibikorwa by’urukozasoni n’ibindi.

Mu ntangiriro za 2015, Justin Bieber yatangaje ko "ashaka kubaho nka Yesu" ndetse yiyemeza kwiyegurira Imana, gusa nabwo biba iby’ubusa akomeza kuvugwa mu bikorwa byiganjemo iby’urugomo no kwishongora ku bafana, hari n’abagiye bamushinja kubakubita batamwanduranyijeho.

Ikinyamakuru The Sun cyandikirwa mu Bwongereza cyatangaje ko uyu musore amaze iminsi ashaka kwigarura ku murongo. Umwe mu nshuti ze za hafi yabwiye iki kinyamakuru ko hashize iminsi asoma Bibiliya mu buryo atamenyereweho ndetse agashishikazwa cyane no kwigisha abo mu muryango we n’inshuti zimuherekeza mu bitaramo agenda akora ngo bagandukire Imana.

Yagize ati "Mu rwambariro mu bitaramo bye bya Purpose Tour, Justin Bieber amaze iminsi yicara atuje, mu gihe yitegura kujya ku rubyiniro akababwiriza abashishikariza gushyira Kirisitu imbere ya byose."

"Intego ye ni uguhindura abantu bamuri hafi akunda ndetse akaburira ibindi byamamare kugendera kure ikibi". Yongeyeho ati "Ubuzima bwa Justin Bieber bwahindutse bwiza, kuva yakwiyegurira Imana asigaye afata ibyemezo bikwiye kandi yaboneye amahoro mu kwizera kwe."

Justin Bieber asigaye yita cyane ku kwigisha bagenzi be gukora icyiza

Mu minsi ishize Justin Bieber yavuye ku rubuga rwa Instagram amaze gutukana bikomeye na bamwe mu bafana be, haciyemo iminsi ahita atangaza ko urwo rubuga yavuyeho burundu ari ukuzimu. Imwitwarire idasanzwe agenda agaragaza ntiyakirwa neza n’abafana be nubwo ayubahirwa n’inshuti ze zimwegereye.

Mu bitaramo bya "Purpose Tour" agenda akora hirya no hino ku Isi, Justin Bieber yakunze kutumvikana n’abafana no gushyamirana nabo. Mu byumweru bishize yabwiye abafana be i Londres ko ‘bakwiye guceceka bakamutega amatwi igihe arimo kuvuga’, ab’i Manchester na bo yarababwiye ngo ‘baceceke’ bibabaza benshi babifashe nko kubasuzugura.

Muri Gicurasi uyu mwaka nabwo yavuze ko atifuza abafana bamwifotorezaho cyane bituma yiyumva “nk’inyamaswa yo muri pariki”.

Justin Bieber ngo ntakirangwa n'imyitwarire mibi no gukora urugomo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE