Kwamamaza

Kanye West yajyanwe mu bitaro

Yanditswe kuya 22-11-2016 saa 16:24' na IGIHE


Umuraperi Kanye West yajyanywe mu bitaro mu Mujyi wa Los Angeles, yagize ikibazo cy’uburwayi butunguranye buherekejwe no kugira umujinya n’ibindi bibazo byo mu mutwe.

Kanye West yashyizwe mu bitaro nyuma y’uko yari yasubitse ibitaramo 21 byari bisigaye ngo asoze urugendo rw’ibyo yise ‘Saint Pablo Tour’.

Associated Press yatangaje ko Kanye West yajyanwe mu bitaro byitwa Ronald Reagan UCLA Medical Center biri mu Mujyi wa Los Angeles ku gicamunsi cyo kuwa Mbere tariki ya 21 Ugushyingo 2016. Mu kumujyana kwa muganga ngo Polisi yabanje guhuruzwa ibwirwa ko umuntu yayogoje agace ka West Hollywood ihageze isanga nta mutekano wahungabanye ahubwo hari ingobyi y’abarwayi yari ije gutwara Kanye West.

Umuvugizi wa Polisi muri Los Angeles yabwiye Associated Press ko batabaye nyuma yo guhuruzwa n’umuturage utuye ahitwa Laurel Avenue hafi ya West Hollywood avuga ko yaza ikabakiza umuntu wababujije. Ngo byari saa saba n’iminota 20 zo ku gicamunsi.

Polisi ivuga ko uwo muntu yari Kanye West wari ujyanwe kwa muganga gusa ngo batohoje neza basanga ntacyo yahungabanyije nk’uko ibirego byashyikirijwe inzego z’umutekano. Uyu muvugizi yahamije ko imodoka yajyanye Kanye West ku bitaro inahita imushyira mu gice cyita ku bafite ibibazo byo mu mutwe.

Umuvugizi wa Kanye West ndetse n’uw’umugore we Kim Kardashian banze kuvugana n’iki kinyamakuru ngo basobanure iby’uburwayi bw’uyu muraperi.

Kim Kardashian yari yagiye i New York mu muhango wari wateguriwe guha icyubahiro se Robert Kardashian witabye Imana. Ibinyamakuru bimwe bivuga ko Kim atigeze ahagera gusa Daily Mail yo ivuga ko yasubitse urugendo rw’i New York ahita afata indege imusubiza i Los Angeles kureba umugabo we.

Kanye ajyanwa kwa muganga hari nyirabukwe Kris Jenner, Khloe Kardashian ndetse na Kourtney Kardashian. Kris yabajijwe uko umwuka wari umeze hagati y’umukwe we na Kim mbere y’ubu burwayi avuga ko “Bari bameze neza cyane.”

Kuwa Gatanu tariki ya 18 Ugushyingo 2016, Kanye West yasoje igitaramo yakoreye muri San Jose avuga ko atatoye ariko ngo iyo ajya gutora yari guhitamo Donald Trump.

Mu gitaramo yakoze kuwa Gatandatu muri Sacramento yasoje aririmbye indirimbo enye gusa hanyuma afata iminota icumi ya nyuma yibasira Beyonce, Jay Z, Hillary Clinton, Mark Zuckerberg, radio na MTV. Ibyo Kanye yakoze mu mpera z’icyumweru gishize bimaze iminsi byarateje impagarara ku mbuga nkoranyambaga by’umwihariko Twitter.

Ibitaramo 21 yagombaga gukora asoza urugendo yise ‘Saint Pablo Tour’ yabihagaritse ndetse ngo abari baraguze amatike bagiye gusubizwa amafaranga yose batanze. Ibi bitaramo byari biteganyijwe kuzarangira kuwa 31 Ukuboza 2016, yagombaga kuzaririmba mu bihe bitandukanye i Dallas, Denver, Atlanta, Philadelphia, Detroit, Boston, New York City na Washington, D.C. n’ahandi hatandukanye.

Kanye West yari amaze iminsi yibasira abantu mu bitaramo bye
Kim Kardashian n'umugabo we Kanye West ngo nta bibazo bari basanzwe bafitanye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved