Kanye West yongeye kugaragara mu ruhame nyuma y’igihe amaze mu bitaro

Yanditswe na Dusabimana Aimable
Kuya 10 Ukuboza 2016 saa 04:09
Yasuwe :
0 0

Umuraperi Kanye West yongeye kugaragara mu ruhame nyuma y’iminsi agize uburwayi butunguranye buherekejwe n’ibindi bibazo byo mu mutwe byatumye ajyanwa mu bitaro igitaraganya.

Kanye West yafashwe n’uburwayi ku gicamunsi cyo ku wa Mbere tariki 21 Ugushyingo 2016. Yamaze iminsi igera ku icyenda yitabwaho n’abaganga bo mu bitaro bya Ronald Reagan UCLA Medical Center biri mu Mujyi wa Los Angeles.

Yagombaga kuba yarasezerewe mu bitaro ku wa 28 Ugushyingo ariko abaganga basanga uburwayi bwe bugikomeye bityo agumishwamo kugeza ku mugoroba wo ku wa Gatatu tariki ya 30 Ugushyingo 2016 ubwo yasezererwaga. Nyuma yo kuva mu bitaro byavuzwe ko yabaye avuye mu muryango we akajya kuba wenyine kugira ngo yongere gusubira ku murongo.

Mu masaha y’umugoroba wo ku wa 8 Ukuboza uyu muraperi w’icyamamare ku Isi yongeye kugaragara mu ruhame aho yari yagendereye ikigo cyitwa MOCA Pacific Design Center giherereye mu Burengerezuba bwa Hollywood.

Muri iki kigo Kanye West yitabiriye igikorwa cyateguwe n’umwe mu bahanzi b’imideli bakomeye witwa Rick Owens, cyo kwerekana imyambaro igezweho n’ibindi bihangano by’ubugeni bitandukanye.

Nyuma y’iminsi imukomereye y’uburwayi bwatumaga agaragazaga imyitwarire idasanzwe no kwadukira abantu bose akabatuka mu ruhame nta mpamvu, kuri ubu biravugwa ko Kanye West usibye kugaragara mu ruhame yanatangiye gusubukura gahunda z’imishinga y’umuziki yari afite.

TMZ ivuga ko iminsi uyu muhanzi yamaze ari mu bitaro yamukomereye cyane ku buryo ayigereranya n’ibihe byo mu 2002 ubwo yakoraga impanuka y’imodoka Imana igakinga akaboko. Ubu burwayi yari amaranye iminsi anabusanisha n’akababaro yagize ubwo nyina witwa Donda yapfaga mu mwaka wa 2007.

Ubu burwayi yagize ngo bwamuteye igihombo gikomeye mu muziki we kuko hari imishinga yahagaritse irimo n’indirimbo yitwa "Through The Wire" yagombaga gukora bikazamo kidobya kandi yari ayitezeho umusaruro uremereye.

Mu ntangiriro z’iki cyumweru, ikinyamakuru Us Weekly cyatangaje nyuma y’ibibazo by’uburwayi bwa Kanye West, umugore we Kim Kardashian yaba agiye gusaba ko batandukana ndetse agasigarana abana akabarera wenyine.

Nyuma y’aya makuru yanahise akwirakwizwa mu buryo bwihuse ku mbuga zikomeye muri Amerika, kuri konti y’urubuga rwa Twitter y’ikiganiro "Keeping Up With The Kardashians" hasohotseho ubutumwa buvuga ko nta bibazo biri mu muryango wa Kanye West n’umugore we byatuma batandukana.

Us Weekly yo yari yatangaje ko Kim Kardashian amaze iminsi arindira kure abana yabyaranye n’umugabo we Kanye West kubera ibibazo by’uburwayi amaranye iminsi byatumaga atamenya kwitwararika ndetse ntanagire ubwirinzi.

Kanye West na Kim Kardashian bafitanye abana babiri aribo North “Nori” West w’imyaka itatu na Saint West ufite umwaka umwe. Aba bombi batangiye gukundana muri Mata 2012, basezerana kubana mu birori byabereye mu Butaliyani byabaye tariki 24 Mata 2014.

Mbere ya Kanye West, Kim Kardashian yari yaratandukanye n’abandi bagabo babiri barimo Damon Thomas na Kris Humphries ukina muri NBA[uyu bamaranye iminsi 72 bahita batandukana]. Kanye West we mbere yo kurushinga na Kim Kardashian azwiho kuba yarakundanye na Amber Rose kuva mu 2008 kugeza mu mwaka wa 2010.

Ibyo gutandukana kwabo babyamaganiye kure
Ibibazo byo mu mutwe Kanye West yari yagize yabitewe no kwibuka nyina wapfuye muri 2007
Kim Kardashian na Kris Humphries barushinze muri 2011 batandukana bamaranye iminsi 72
Mu mwaka wa 2010, Kim yakundanye bikomeye na Reggie Bush

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza