Kim Kardashian arashaka gutandukana na Kanye West

Yanditswe na Munyengabe Murungi Sabin
Kuya 8 Ukuboza 2016 saa 07:47
Yasuwe : XX
0

Kim Kardashian umugore w’umuraperi Kanye West bamaze imyaka igera kuri itatu barushinze mu buryo bwemewe n’amategeko, biravugwa ko ashaka kwaka gatanya nyuma y’iminsi y’ibibazo by’urudaca mu rugo rwabo.

Ikinyamakuru Us Weekly cyatangaje iyi nkuru bwa mbere, cyavuze ko cyabwiwe n’inshuti ya hafi ya Kim Kardashian ko mu buryo bw’ibanga amaze igihe ategura umugambi wo gutandukana na Kanye West gusa akaba yarabanje kubyitondera kubera ibibazo by’uburwayi umugabo yari amaranye iminsi.

Iyi nshuti ya Kim Kardashian itatangajwe amazina yavuze ko ‘ashaka gatanya’ kuko ‘yiyumva nk’uwazirikiwe mu rushako’, yongeyeho ko ariko ‘bizasaba igihe mbere y’uko agira icyo akora’. Yanatangaje ko Kim Kardashian amaze igihe ari gutegura ikirego kizatuma ahabwa abana bose yabyaranye na Kanye West.

Kanye West na Kim Kardashian bafitanye abana babiri aribo North “Nori” West w’imyaka itatu na Saint West ufite umwaka umwe. Aba bombi batangiye gukundana muri Mata 2012, basezerana kubana mu birori byabereye mu Butaliyani byabaye tariki 24 Mata 2014.

Hari hashize iminsi Kanye West agize uburwayi butunguranye bwiganjemo uruhurirane rw’ibibazo byo mu mutwe n’ihuzagurika mu mitekerereze, yamaze iminsi igera ku icyenda arwajwe n’umugore we mu bitaro bya Ronald Reagan UCLA Medical Center biri mu Mujyi wa Los Angeles.

Yavuye mu bitaro ku mugoroba wo kuwa Gatatu tariki ya 30 Ugushyingo 2016. Kugeza n’ubu ntaramerwa neza mu buryo bukwiye, yariheje mu muryango we ajya kuba wenyine kugira ngo yongere gusubira ku murongo. Mbere yo kujyanwa mu bitaro, hari hashize amasaha make asubitse ibitaramo bigera kuri 21 yari asigaje gukora mu rugendo rw’ibindi byinshi yise ‘Saint Pablo Tour’.

Ibibazo by’uburwayi butunguranye Kanye West yahuye nabyo yabigize nyuma y’ibyumweru bitatu Kim Kardashian na we acucuwe n’abajura bitwaje imbunda bamusanze muri hoteli yari acumbitsemo ubwo yari ari i Paris mu Bufaransa bakamwiba amafaranga yo kwifashisha yari yagendanye ndetse n’imirimbo ihenze ibarirwa agaciro ka miliyoni eshatu z’amadolari.

Inshuti ya Kim Kardashian yahishuye amakuru yo kuba uyu mugore ashaka gatanya, yatangaje ko atazafata icyemezo umugabo we atarakira neza. Ati “Yita kuri Kanye West kandi arumva atuje kuko [Kanye West] ari kubona ubufasha bwose akeneye.”

Yanavuze ko uyu mugore w’icyamamare ku Isi amaze iminsi arindira kure abana yabyaranye n’umugabo we Kanye West kubera ibyo bibazo by’uburwayi amaranye iminsi.

Mbere ya Kanye West, Kim Kardashian yari yaratandukanye n’abandi bagabo babiri barimo Damon Thomas na Kris Humphries ukina muri NBA[uyu bamaranye iminsi 72 bahita batandukana]. Kanye West we mbere yo kurushinga na Kim Kardashian azwiho kuba yarakundanye na Amber Rose kuva mu 2008 kugeza mu mwaka wa 2010.

Kim Kardashian n'umugabo we Kanye West bagiye gutandukana
Byari bimaze iminsi bivugwa ko Kanye West na Kim Kardashian batabanaga muri iyi nzu yabo iri mu gace ka Bel-Air i Los Angeles
Kim ngo arifuza ko yasigarana abana akabarera wenyine
Ubushyamirane bwatangiye gukaza umurego kuva ubwo Kim bamwibiye i Paris
Kim agiye gutandukana na Kanye West nyuma y'imyaka ibiri n'igice bamaze barushinze
Kim Kardashian na Kris Humphries barushinze muri 2011 batandukana bamaranye iminsi 72
Mu mwaka wa 2010, Kim yakundanye bikomeye na Reggie Bush

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE