Masekela umunyabigwi muri Jazz yitabye Imana

Yanditswe na Munyengabe Murungi Sabin
Kuya 23 Mutarama 2018 saa 11:38
Yasuwe :
0 0

Umuririmbyi akaba n’umucuranzi ukomeye mu njyana ya Jazz muri Afurika y’Epfo, Hugh Masekela yitabye Imana azize uburwayi.

Hugh Masekela wari ufite imyaka 78 yafatwaga nk’impirimbanyi yagize uruhare mu gushyira iherezo ku ivangura ryashegeshe Afurika y’Epfo rya apartheid. Kugeza uyu munsi afatwa nk’ umubyeyi w’injyana ya Jazz muri Afurika y’Epfo.

BBC yatangaje ko umuryango wa Masekela wasohoye itangazo ribika urupfu rwe mu masaha ya mugitondo cyo kuri uyu wa Kabiri tariki ya 23 Mutarama 2018. Iri tangazo rishimangira ko ‘yasinziriye mu mahoro’, yaguye mu rugo rwe mu Mujyi wa Johannesburg nyuma y’imyaka igera ku icumi ahanganye na kanseri y’amabya.

Masekela yabaye ikirangirire ku Isi kubera umwihariko we mu njyana ya Afro-Jazz no mu ndirimbo zubatse amateka nka ‘Soweto Blues’ iri mu zakoze akazi gakomeye mu guhangana na apartheid.

Masekela yavukiye mu Mujyi wa Witbank mu 1939, yize kuvuza ibirumbeti n’umwirongi wa kinyafurika nyuma yo kubona Kirk Douglas akina mu kigwi cya Bix Beiderbecke[umuhanga mu kuvuza ikirumbeti] muri filime.

Masekela yinginze padiri wamwigishaga ngo amugurire icyo gicurangisho bityo ave mu gice cy’abaturage barwanyaga apartheid. Ibi niko byaje kugenda gusa amaze kugurirwa iki gicurangisho yarushijeho gukaza umurego mu kwiga umuziki no kwandika amagambo yamagana iri vangura.

Yaherukaga gukora igitaramo gikomeye mu mwaka wa 2010 ubwo yaririmbaga mu birori byo gufungura imikino y’igikombe cy’Isi yabereye muri Afurika y’Epfo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza