Murumuna wa Kim Kardashian yatandukanye n’umugabo we bidasubirwaho

Yanditswe na Uwishyaka Jean Louis
Kuya 11 Ukuboza 2016 saa 11:50
Yasuwe :
0 0

Khloe Kardashian, murumuna wa Kim Kardashian, yahawe impapuro za gatanya zimwemerera gutandukana n’umugabo we Lamar Odom mu buryo bwemewe n’amategeko nyuma y’imyaka itatu ashyikirije ikirego urukiko.

Khloe Kardashian ni rwiyemezamirimo wabigize umwuga, asanzwe afasha abo mu muryango w’aba-Kardashians mu bikorwa by’ubucuruzi butandukanye bakora, anakurikirana amaduka y’imyenda akomeye yashinzwe n’abagize uyu muryango w’ibyamamare.

Khloe Kardashian na Lamar Odom wahoze ukinira ikipe ya Los Angeles Clippers (basketball) bashinze urugo muri 2009, ariko ntibabyarana. Khloe Kardashian asaba gatanya yavuze ko yafashe icyo cyemezo bitewe n’ibibazo ’bidashobora gukemuka’ afitanye n’umugabo we.

Aba bombi bari bafitanye ikigo cy’ubucuruzi bahuriyeho kitwa "Khlomar", gusa imyanzuro y’urukiko nyuma y’uko hemejwe gatanya, yategetse ko ibi bikorwa byabo byaseswa.

Ikinyamakuru CNN cyatangaje ko impapuro zemeza gatanya y’ibi byamamare, zasohotse mu rukiko rwa Los Angeles ku wa Gatanu w’iki Cyumweru, ariko imyanzuro yo kubatandukanya burundu izatangira gushyirwa mu bikorwa guhera ku itariki 17 Ukuboza 2016.

Khloe Kardashian yagejeje ikirego cye mu rukiko asaba gatanya muri 2013, aza kugihagarika muri 2015 biturutse ku burwayi bukomeye bwibasiye Lamar Odom biturutse ku gukoresha ibiyobyabwenge birimo na Cocaine. Muri Gicurasi uyu mwaka, nibwo uyu mugore yongeye kwaka gatanya ku nshuro ya kabiri.

Lamar Odom yakinnye muri NBA kuva mu 1999 kugeza muri 2013. Yanyuze mu makipe akomeye muri Basketball yo muri Leta Zunze Ubumwe za Amerika arimo Dallas Mavericks, Miami Heat, Los Angeles Lakers n’andi.

Khloe Kardashian atandukanye n’uwo bashakanye, nyuma y’aho mukuru we Kim Kardashian, umugore w’umuraperi Kanye West bamaze imyaka igera kuri itatu barushinze mu buryo bwemewe n’amategeko, bivugwa ko na we ashaka kwaka gatanya nyuma y’iminsi y’ibibazo by’urudaca mu rugo rwe.

Kardashian n'umugabo we bemerewe gutandukana burundu
Lamar Odom yakiniye amakipe akomeye muri NBA nka Los Angeles Lakers

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza