Perezida Magufuli yatunguranye ahamagara Diamond ari mu kiganiro kuri Televiziyo

Yanditswe na IGIHE
Kuya 14 Werurwe 2017 saa 06:08
Yasuwe :
0 0

Umuririmbyi Diamond Platnumz uri mu ba mbere bakunzwe muri Tanzania na Afurika yose yatunguwe mu buryo bukomeye no guhamagarwa na Perezida Joseph Pombe Magufuli ubwo yari mu kiganiro kuri Televiziyo.

Diamond yatumiwe mu kiganiro cyitwa 360 kuri Televiziyo Clouds TV kuri uyu wa Mbere tariki ya 13 Werurwe 2017, yavugaga birambuye ku muziki we n’icyerekezo afite. Umukuru w’Igihugu cya Tanzania, Pombe Magufuli yatunguranye ahamagara ashimira uyu muhanzi ku ntambwe amaze gutera.

Perezida Magufuli agitangira guhamagara kuri Clouds TV yabanje gushimira byimazeyo Diamond umaze kubyara abana babiri kuko ngo ‘ubwo yiyamamarizaga umwanya w’Umukuru w’Igihugu yari afite umwana umwe’.

Yagize ati “Urakomeye cyane Diamond […] Ubwo niyamamazaga wari ufite umwana umwe none ubu ufite babiri, nimwonkwe.” Diamond yahise amushimira ku bushake afite mu guteza imbere ubuhanzi muri Tanzania anamusaba ko yakomeza gushyira imbere umuziki kuko ubarizwamo abantu benshi ndetse ko bahawe amahirwe bakanashyirirwaho gahunda nzima wabatunga n’igihugu kigatera imbere.

Yagize ati “Ndagushimiye cyane, mu by’ukuri dukeneye ko udufasha. Dufite imiryango, dufite abana, duhanze amaso umuziki kugira ngo twiteze imbere, nihashyirwaho uburyo bwiza bwo kwishyura imisoro ibintu bizaba byiza […] Nitwishyura imisoro neza bizafasha benshi, bizateza imbere igihugu natwe bidufashe kubona ubushobozi bwo kubaka igihugu cyacu.”

Ubwo Diamond yari mu kiganiro kuri Clouds TV

Perezida Magufuli yongeye gushima byimazeyo Diamond ndetse amuhamiriza ko yumvise ubusabe bwe. Yanavuze ko akunda cyane abakinnyi ba filime muri Tanzania, ngo akunda ubuhanzi kandi azakomeza kubushyigikira.

Yagize ati “Urakoze cyane, nakumvise ariko ndagushimiye ku bwo kumenyekanisha Tanzania binyuze mu muziki, nshimiye kandi na bariya bose bakina filime ndabakunda cyane.”

Perezida Kikwete wahoze ku ntebe y’ubutegetsi mbere ya Magufuli na we yashyigikiraga umuziki cyane, ni kenshi yagiye atumira Diamond n’abandi bahanzi babaga bafite ibikorwa by’indashyikirwa bagezeho agasangira na bo ku meza.

Diamond yasabye Perezida Magufuli gukomeza gushyigikira umuziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza