Rose Muhando yimukiye muri Kenya ahunga umugabo yanze ko baryamana ushaka kumwica

Yanditswe na IGIHE
Kuya 19 Gicurasi 2017 saa 03:02
Yasuwe :
0 0

Umuririmbyi Rose Muhando wo muri Tanzania amaze igihe avugwa mu bibazo bikomeye, ubu yagiye gutura muri Kenya ahunga ibibazo n’umugabo ushaka kumwica amuryoza ko yanze ko baryamana.

Rose Muhando azwi cyane mu ndirimbo ’Nibebe’ yasohotse kuri album yise Jipange Sawa Sawa, n’izindi yagiye akora. Ni umwe mu baririmbyi bakomeye muri Tanzania babimazemo igihe kirekire.

Mu myaka itatu ishize, Rose Muhando yavuzwe ubutitsa mu binyamakuru bitandukanye muri Tanzania ashinjwa gukoresha ibiyobyabwenge, ubusinzi, gukuramo inda, ubwambuzi n’ibindi.

Yaherukaga kuvugwa mu nkuru zamushinjaga ko ibiyobyabwenge byasaritse uyu muhanzi ndetse ngo yashakishijwe igihe kinini kugira ngo ajyanwe mu kigo ngororamuco ariko inzego z’umutekano n’umuryango baramubura.

Yari aherutse guhishura ko ubuzima bwe buri mu kaga kubera umugabo[atavuze izina] wari usanzwe amufasha mu muziki ariko waje kumwihinduka amusaba ko bakorana imibonano mpuzabitsina undi aramwangira ibibazo bivuka ubwo.

Mu kiganiro na Daily Nation, Rose Muhando yasobanuye ko ubu yagiye gutura muri Kenya ndetse ngo ntateganya kuzasubira iwabo muri Tanzania kuko ahahurira n’ibibazo ndetse ngo mu myaka ahamaze nk’umuhanzi yabayeho ubuzima bushaririye gusa.

Yagize ati “Mu by’ukuri naje gutura muri Kenya burundu, ndambiwe kubaho ubuzima bwuzuyemo ibibazo no guhangayika, guterwa ubwoba ko nzapfa. Mu by’ukuri nta byishimo mfite kandi nta mutekano, no mu ijuru barabizi…”

Muhando yavuze ko mu byo ahunga harimo umugabo wamujujubije wahoraga amusaba ko baryamana yabyanga akamubwira ko agomba kuzamwica ndetse ngo niyo mpamvu amaze iminsi yarihishe abantu bagakeka ko ari inkurikizi z’ibiyobyabwenge.

Ni inkurikizi zo kwanga kuryamana n’uwamufashaga

Yashimangiye ko uyu mugabo ari we uri inyuma y’ibibazo byose Muhando yavuzwemo birimo kumuhimbira ibinyoma by’uko yakuyemo inda, kunywa ibiyobyabwenge n’ibindi. Ati “Impamvu ni uko uwo muntu aziranye na Polisi, abakuru ba stations za polisi bose baraziranye ndetse n’inshuti z’abayobozi b’itorero, biramworohera kumvugaho ibintu bibi byose.”

Yongeraho ati “Sinywa ibiyobyabwenge ndetse sinzabikoresha. Mu by’ukuri kuko abona ko ibyo bibazo ari byo byarangiza izina ryanjye niko abigenza, ariko nzi neza ko azatsindwa. Umuntu ukora ibyo ni ushaka kundangiza, yashatse ko mba umuntu we akankoresha ibyo ashaka ndabyanga.”

“Ndi umubyeyi w’abana batatu(Gift, Nicolas na Maximilian), mfite abavandimwe, banshyiraho ibyo binyoma kuko bazi ko nta muntu umvuganira ariko ndababwiza ukuri ko Imana ihari.”

Uyu mugabo ngo yari asanzwe afasha Rose Muhando, yamuhaga amafaranga yo gukora indirimbo ndetse akamufasha mu bikorwa bitandukanye by’umuziki bigeze igihe amusaba ko baryamana undi amubera ibamba.

Arongera ati “Ibi byose rero, ni uko nanze kuryamana na we. Narashavujwe bihagije, nabyaranye n’abagabo baransiga […] Ubu ntewe ubwoba n’uko hari ushaka kunyica, ndumva ntagishaka kuba mu gihugu. Mu by’ukuri kuba ndi muri Kenya ni byo bimushimishije?

Rose Muhando asobanura ko hari umugabo washatse ko baryamana arabimwangira

Muhando yavuze ko ubuzima bwe bumaze kunanizwa ku rwego rukomeye ku buryo yumva amaze kurambirwa kubaho avugwa mu bibazo kandi by’ibihimbano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza