Soulja Boy yahosheje intambara y’amagambo hagati ye na Chris Brown

Yanditswe na Dusabimana Aimable
Kuya 5 Mutarama 2017 saa 04:51
Yasuwe : XX
0

Umuraperi DeAndre Cortez Way [Soulja Boy] yiseguye kuri Chris Brown n’abafana be nyuma yo kumwibasira akamwandagaza ku mbuga nkoranyambaga mu magambo yuzuye ibitutsi amushinja gufuhira by’indengakamere Karrueche Tran bahoze bakundana.

Soulja Boy yamenyekanye cyane mu ndirimbo ’Crank Dat’, ’Kiss Me Thru the Phone’, ’Turn My Swag On’ n’izindi nyinshi yagiye akora. Abakurikiranye umuziki wo mu njyana ya Crank yaciye ibintu mu bihe byashize bamuzi birushijeho.

Mu ijoro ryo ku wa Mbere w’iki Cyumweru tariki 2 Mutarama 2017, uyu muraperi yatangaje amagambo yuzuye uburakari n’umujinya yibasira Chris Brown avuga ko yamuhamagaye kuri telefoni igendanwa akamusaba kugendera kure Karrueche Tran bahoze bakundana.

Mu magambo yari yanditse ku rubuga rwa Twitter ashotora bikomeye Chris Brown yamushinje kuyoborwa n’ibiyobyabwenge n’ibindi birimo ubwibone n’uburaya. Yanamubwiye ko kuba yarakubise Rihanna bakundanye bidakwiye gutuma yiyumva ngo atekereze ko na we ari uko byagenda.

Chris Brown we mu butumwa yagiye yandika ku rubuga rwa Instagram, yavuze ko ibyo mugenzi we yatangaje ’yabitewe n’imiti imurusha imbaraga aba yanyoye’, yanditse ku ifoto ye avuga ko imiterere ye n’uburyo asa ubwabyo "bihishura ko yabaswe n’ibiyobyabwenge."

Hari hasakaye n’andi makuru avuga ko aba bombi bashobora guhurira mu mukino w’iteramakofe bagahabwa rugari kugira ngo bumvane imitsi ibibazo byabo babikemure.

Nyuma y’inkundura y’amagambo hagati y’aba bahanzi bombi, Soulja Boy yashyize ahagaragara amashusho akubiyemo ubutumwa bwo gusaba imbabazi Chris Brown avuga ko uburyo amaze iminsi yitwara abiterwa n’ihungabana mu bitekerezo yatewe na nyina umubyara urembeye mu bitaro.

Yagize ati "Ndashaka gusaba imbabazi. Nk’uko mwabyumvise mu minsi ishize umubyeyi wanjye yajyanwe mu bitaro gusa ubu abaganga bambwiye ko agiye kumererwa neza, ibintu byose bimeze neza."

"Ndabizi ko na we ubwe adashimishijwe na gato n’uburyo maze iminsi nitwara, gusa ndabisabira imbababazi."

Soulja Boy yakomeje avuga ko yifuza no gukorana indirimbo n’abahanzi batandukanye yari amaze iminsi ashotora barimo na Chris Brown. Mbere yuko umwaka wa 2016 urangira uyu muraperi yari yabanje kugirana ibibazo n’abandi bahanzi barimo uwitwa Lil Yachty, Quavo na Shia LaBeouf.

Soulja Boy mu minsi ishize yaherukaga no gutabwa muri yombi na Polisi yo mu Mujyi wa Los Angeles aho atuye akurikiranweho gutunga imbunda mu buryo butemewe n’amategeko.

Soulja na Chris Brown bateranye amagambo bapfa Karrueche Tran
Soulja Boy yavuze ko uburyo amaze iminsi yitwara yabitewe n'ihungabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza