Steve Ditko washushanyije Spiderman yitabye Imana

Yanditswe na Mukaneza M.Ange
Kuya 7 Nyakanga 2018 saa 11:45
Yasuwe :
0 0

Steve Ditko, Umunyamerika wamenyekanye cyane kubera guhanga no gushushanya Spiderman, intwari idasanzwe igaragara mu bitabo no muri filime, yitabye Imana afite imyaka 90.

Polisi yo mu Mujyi wa New York yatangarije Hollywood Reporter ko ku itariki 29 Kamena aribwo Dikto yasanzwe iwe yapfuye. Bikekwa ko umurambo we wabonetse amaze iminsi ibiri ashizemo umwuka.

Mu 1961 Dikto wari umukozi mu kigo gikora inkuru zishushanyije cya Marvel Comics yahanze Spider-Man, ni nyuma y’uko izi nshingano azihawe na Stan Lee wari umwanditsi mukuru.

Lee wifuzaga ko hahangwa ingimbi ifite imbaraga ikomora ku gitagangurirwa (spider), yabanje gusaba uwitwa Jack Kirby gukora igishushanyo, ariko aza kumwambura izi nshingano kuko atari yanyuzwe n’akazi yakoze.

Uko Spider-Man agaragara muri film z’ubu ni ukuvuga imyambaro y’ubururu n’umutuku, indodo z’igitagangurirwa byose byashushanyijwe na Dikto.

Mu 1963 kandi Dikto yanashushanyije indi ntwari ifite imbaraga zidasanzwe izwi nka Doctor Stange. Yanatanze umusanzu mu gukora inkuru zishushanyije zirimo iyitwaga ‘Machine Man and the Micronauts’, Squirrel Girl, Mr.A n’abandi.

Abantu batandukanye barimo Neil Gaiman na we wandika ibitabo birimo inkuru zivuga ku ntwari zidasanzwe (superhero) bagaragaje ko bababajwe n’urupfu rwa Dikto, bemeza ko yababereye icyitegererezo.

Inzu itungikora filime ya DC Comics yakoreye igihe kitari gito yifashishije Twitter igaragaraza ko Dikto ari umwe mu bashushanyi n’abahanzi babayeho mu mateka y’Isi, kandi yerekanye ko buri wese yifitemo ububasha bwo kuba intwari.

Stephen J.Dikto wavukiye muri Johnstown muri Leta ya Pennsylvania kuwa 2 Ugushyingo 1927, yatangiye kugaragaza gukunda gushushanya akiri muto, abikomoye ku buryo se yakundaga intwari zidasanzwe zari mu bitabo byasohokaga icyo gihe nka Prince Valiant na Batman.

Dikto witabye Imana afite imyaka 90 ntiyakundaga kugaragara mu ruhame

Uretse Marvel Comis na DC Comics, Dikto upfuye amaze imyaka itari mike yikorera ku giti cye aho atakundaga kugaragara mu ruhame yanakoranye na Joe Simon wahanze intwari idasanzwe y’umusirikare izwi nka Captain America.

Steve Dikto niwe washushanyije Spiderman ugaragara mu bitabo na filime z'ubu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza