Paris: Abantu 16 bafunzwe bakurikiranyweho ubujura bwakorewe Kim Kardashian

Yanditswe na Philbert Girinema
Kuya 9 Mutarama 2017 saa 11:23
Yasuwe : XX
0

Abantu bagera kuri 16 batawe muri yombi na Polisi yo mu Bufaransa bakurikiranyweho ubujura bwakorewe Kim Kardashian mu Ukwakira 2016 ubwo yari ari muri hoteli imwe yo Mujyi wa Paris.

Kim Kardashian yacucuwe n’abajura babiri bambaye imyenda nk’iya Polisi, bamufatiyeho imbunda ubwo bari bamusanze mu cyumba cya hoteli yari acumbitsemo mu Mujyi wa Paris mu masaha ashyira igitondo cyo ku wa 3 Ukwakira 2016.

Mu gihe ubwo bujura bwakozwe, Kim Kardashian w’imyaka 35 basanze atari kumwe n’umurinzi we witwa Pascal Duvier [waje kwirukanwa nyuma], kuko ngo muri iryo joro yari yaherekeje Kendall Jenner mu kabyiniro. Kim Kardashian akimara kwibwa yahise ava mu Bufaransa igitaraganya, yohererejwe indege ye bwite imusubiza muri Amerika aho asanzwe atuye n’umuryango we.

Ibiro Ntaramakuru by’Abafaransa, AFP, byatangaje ko mu gitondo cyo kuri uyu wa Mbere tariki ya 9 Mutarama 2017, Polisi y’u Bufaransa yataye muri yombi abantu 16 bakekwaho kugira uruhare muri ubu bujura bwakorewe Kim Kardashian.

Hari n’ibindi binyamakuru bitandukanye birimo Europe 1 na RTL byatangaje ko abatawe muri yombi ari abantu 15 aho kuba 16. Aba bose ngo bahise batangira guhatwa ibibazo na Polisi iri gukora iperereza ryimbitse kuri ubu bujura.

Mu Ukwakira, Reuters yari yavuze ko abajura bacucuye Kim Kardashian bari babiri bipfutse mu maso ndetse bari biyoberanyije mu mwambaro wa Polisi y’u Bufaransa. Bageze mu cyumba umwe yahise atunga imbuga ku mutwe wa Kim Kardashian, uyu mugore ngo yahise ‘asaba imbabazi avuga ko bamugirira impuhwe ntibamwice kuko afite abana babiri bato’.

Mu cyumba yari afitemo amafaranga yo kwifashisha n’imirimbo y’agaciro ifite agaciro ka miliyoni esheshatu z’amadolari, ibi byose abajura barabikukumbye barabyandurukana ntibamenyekana.

Kim Kardashin kandi bamwibye impeta ihenze yambitswe n’umugabo we Kanye West, iyi ifite agaciro ka miliyoni enye z’amadolari ya Amerika. Mu byo bamwibye harimo telefone ebyiri zihenze, ngo hari imwe yari irimo amabanga menshi y’uyu mugore.

Kanye West waririmbaga mu iserukiramuco rya Meadow Music and Art Festival, mu Mujyi wa New York yahise ava ku rubyiniro akimenya inkuru y’uko umugore we yafatiweho imbunda. Yabwiye abitabiriye gitaramo ko ahagaritse igitaramo kuko ‘hari ibibazo umuryango we ugize’.

Kim Kardashian akimara guterwa n'abajura bitwaje intwaro mu Bufaransa yahise ataha igitaraganya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza