Ubuhanga budasanzwe bw’umunyabugeni ushushanya ukaba utabitandukanya n’ifoto

Yanditswe na Dusabimana Aimable
Kuya 20 Mata 2017 saa 04:06
Yasuwe :
0 0

Oresegun Olumide ni umushushanyi w’umunyabugeni ukomoka muri Nigeria, akomeje kugarukwaho cyane mu bitangazamakuru mpuzamahanga bikomeye hirya no hino ku Isi, biturutse ku buhanga budasanzwe agaragaza mu bihangano bye.

Uyu munyabugeni afite ubunararibonye mu kwifashisha amazi n’amavuta mu bihangano akora ku buryo ababyitegereza babitindaho bibaza niba ari ibishushanyo cyangwa amafoto. Yibanda cyane ku kugaragaza ubuzima n’imibereho mu gace atuyemo mu Mujyi wa Lagos.

Mu kiganiro uyu munyabugeni yagiranye na CNN, yasobanuye ko impamvu akunze gukoresha ibisukika mu kuryoshya ibishushanyo n’ibihangano byose akora ari uko ngo mu rurimi rwa Yoruba no mu muco gakondo w’aho akomoka ’amazi atagira umwanzi’.

Yongeyeho ko gukoresha amazi cyangwa ibindi bisukika biha ishusho idasanzwe igihangano cye kuko kigaragara kibonerana kandi cyihariye, ibyo bikagorana cyane ku bandi banyabugeni, ari nayo mpamvu abifata nk’umwihariko we.

Avuga ku gihe igishushanyo kimwe gishobora kumutwara akigikoraho, Oresegun yagize ati "Ni ibintu bigenda bihindagurika, bishobora gufata ibyumweru bitatu gukora ku gihangano kimwe cyangwa se bikaba byanatwara amezi runaka bitewe n’ubwiza nshaka kubona ku gihangano cyanjye."

Oresegun avuga ko yatangiye gukunda ibijyanye n’ubugeni afite imyaka ine y’amavuko gusa atangira kubikora mu buryo bw’umwuga muri 2015. Uyu mugabo w’imyaka 35 ufite ubuhanga budasanzwe mu bugeni yabyize muri Kaminuza yitwa ’Yaba College of Technology’ yo muri Nigeria. Yagiye yerekana ibihangano bye mu bihugu bitandukanye birimo u Budage, Espagne n’ahandi.

Ibishushanyo uyu munyabugeni akora bimaze gutuma yamamara ku mbuga nkoranyambaga zitandukanye akoresha aho akurikiwe n’abarenga ibihumbi 59 biyongera umunsi ku wundi kuri Instagram, amaze gusurwa n’ibinyamakuru bikomeye bitandukanye birimo CNN, iby’iwabo muri Nigeria ndetse n’ibyibanda ku banyabugeni muri rusange.

Ibishushanyo bye ntaho wabitandukanyiriza n'ifoto
Igishushanyo kirangiye
Mbere yo gusiga irangi
Oresegun arashushanya ukaba wakeka ko ari ifoto
Oresegun Olumide ashushanya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza