Umugore wa T.I yasabye gatanya nyuma y’imyaka itandatu barushinze

Yanditswe na Dusabimana Aimable
Kuya 28 Ukuboza 2016 saa 10:02
Yasuwe : XX
0

Tameka "Tiny" Cottle, umugore w’umuraperi T.I. wo muri Leta Zunze Ubumwe za Amerika yasabye gatanya nyuma y’imyaka itandatu bari bamaze barushinze.

T.I. na Tiny basezeranye ku wa 30 Nyakanga 2010 gusa batangiye gukundana kuva mu 2001, bafitanye abana batatu uwitwa King Harris, Major Harris na Heiress Harris. Uyu muraperi w’icyamamare ku Isi asanzwe afite n’abandi bana batatu yabyaye ku ruhande mu gihe umugore we afite umukobwa mukuru yabyaye atarashakana na T.I.

Ikinyamakuru TMZ cyatangaje ko hashize ukwezi uyu mugore wa T.I. atanze impapuro zisaba urukiko ko rwamuha gatanya ibye n’uyu muraperi bikarangira.

E! Online yo ivuga ko hari hashize iminsi hari umwiryane mu muryango wa T.I. na Tiny biturutse ku bwumvikane bucye bugiye gutuma banatandukana. Amakuru aturuka mu bantu begeranye n’uyu muryango avuga ko nubwo bagiye gutandukana bombi bifuza gukomeza kuba inshuti bakarera abana babyaranye mu bwumvikane.

Tiny yabanaga na T.I. mu buryo bwemewe n’amategeko kuva mu 2010. Uyu mugore na we yahoze ari umuririmbyi, yanyuze mu itsinda rikora umuziki mu njyana ya R&B ryitwa Xscape, yanegukanye Gramy Award abikesha indirimbo yitwa "No Scrubs" yandikiye itsinda ryitwa TLC.

Ubuzima bw’urukundo bwihariye aba bombi banyuranyemo bwaranzwe n’ibibazo birimo ibyo gufungwa bazira gufatanwa ibiyobyabwenge, gukwepa imisoro ya Leta n’ibindi. Umubano wabo wakozweho filime mbarankuru yitwa "T.I. & Tiny: The Family Hustle" yatambukaga kuri televiziyo ikomeye muri Amerika yitwa VH1.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza