Umugore yafunzwe nyuma yo gufatirwa mu rugo rwa Drake yikingiranye ahabikwa inzoga

Yanditswe na IGIHE
Kuya 20 Mata 2017 saa 12:26
Yasuwe :
0 0

Umugore witwa Mesha Collins ari mu maboko ya Polisi yo mu Mujyi wa Los Angeles nyuma yo gufatirwa mu nzu y’umuraperi Drake akikijwe n’amacupa y’ibinyobwa bitandukanye byari bibitse muri firigo.

Uyu mugore w’imyaka 24 acumbikiwe kuri Sitasiyo ya Polisi y’ahitwa Malibu/Lost Hills, yatawe muri yombi ku wa Mbere w’iki cyumweru nyuma y’uko inzego zishinzwe umutekano muri ako gace zihamagawe n’abamubonye yinjira kwa Drake, nyuma akaza gufatirwa mu cyumba kibikwamo ibinyobwa bitandukanye mu rugo rw’uyu muraperi.

CNN itangaza ko uyu mugore yashyiriweho ihazabu y’ibihumbi ijana by’amadorali aryozwa kwinjira mu buryo butazwi mu rugo rw’abandi no gushaka kwiba, azajya imbere y’ubucamanza ku wa 26 Mata, uyu mwaka, aburanishwe kuri ibyo byaha.

Polisi ivuga ko yafashe uyu mugore nta gikorwa gikanganye yari yakora usibye kunywa amazi na soda zari zibitse muri firigo y’uyu muraperi. Hakozwe igenzura byemezwa ko nta gikoresho cyangwa ikindi kintu icyo ari cyo cyose Mesha yaba yarangije ubwo yari ari mu nzu ya Drake mu buryo butazwi.

Umuraperi Aubrey ‘Drake’ Graham ni umwe mu bayoboye umuziki aho akomoka muri Canada, muri Leta Zunze Ubumwe za Amerika, mu bihugu bitandukanye by’i Burayi, Australia n’ahandi ku Isi. Yakoze zimwe mu ndirimbo zizwi no muri Afurika nk’iyitwa ‘Started from the Bottom’, ‘What’s my Name’ na ‘Work’ yakoranye na Rihanna, ‘One Dance’ ari kumwe na Wizkid n’izindi.

Yaherukaga gusohora album yise ’More Life’ ica agahigo ko kumvwa inshuro 61,302,082 mu masaha 24 gusa ku rubuga rwa Spotify rucuruza umuziki. Drake yari amaze iminsi akora ibitaramo yise ’Boy Meets World Tour’ byazengurutse hirya no hino ku Isi, amurika iyo album n’iyitwa ’Views’ nayo yashakishijwe cyane kuri murandasi.

Ibitaramo Drake aherutse gukorera mu Bwongereza byasojwe n’inkuru zacicikanye mu binyamakuru aho umunyamideli uzwi cyane kuri Instagram witwa Layla Lace yashyize mu majwi uyu muraperi avuga ko ubwo yari ari muri uru rugendo ku Mugabane w’u Burayi yamutumyeho umusore w’inshuti ye witwa Dj Spade, ngo yarabahuje baramenyana nyuma bahuza urugwiro kugeza ubwo bakoranye imibonano mpuzabitsina idakingiye umukobwa arasama.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza