Umuririmbyi Wizkid yashyiriweho impapuro zimuta muri yombi

Yanditswe na Munyengabe Murungi Sabin
Kuya 17 Ukuboza 2016 saa 12:43
Yasuwe : XX
0

Umuhanzi w’icyamamare muri Nigeria, Wizkid yashyiriweho impapuro zimuta muri yombi ku bwo kutubahiriza amasezerano yasinyanye n’abari bamutumiye gukorera igitaramo muri Uganda.

Urukiko rwo mu Mujyi wa Kampala rwandikiye Polisi Mpuzamahanga ruyisaba ko yafata Ayodeji Ibrahim Balogun [Wizkid] agafungwa kugira ngo abanze yisobanure ku byaha ashinjwa na kompanyi ya Face TV ari nayo yamutumiye muri iki gitaramo yagombaga kuba yarakoze kuwa 3 Ukuboza 2016.

Chimpreports ivuga ko Face TV ibinyujije mu bayunganira mu mategeko ‘Mwema and Co. Advocates’, yasabye ko Wizkid yafungwa akaryozwa ibyaha birimo uburiganya, kubeshya n’ubwambuzi, ibi byose bimuhamye yafungwa imyaka 11 nk’uko bigenwa n’amategeko ya Uganda.

Impapuro zita muri yombi Wizkid zinasaba Interpol ko yafunga manager we witwa Sunday Are ari na we wahawe igiteranyo cy’amafaranga yose.

Ibaruwa yandikiwe urukiko isaba ko rwabafasha gusaba Interpol gufunga Wizkid igaragaza ko uyu muhanzi bamwishyuye amadolari 60,000 naho umujyanama we Sunday Are ahabwa ibihumbi bitanu n’inyongera y’ibihumbi bitatu yagombaga kubafasha kubaho mu gihe bagombaga kumara muri Uganda.

Face TV igaragaza ko gutegura iki gitaramo byayihombeje agera ku bihumbi 300,000 by’amadolari ubariyemo ibikorwa byo kwamamaza, amatike y’indege, gukodesha ibyuma n’ibindi byose bakoze mu myiteguro ya Wizkid bityo bakifuza ko ibi byose abyishyura hageretseho n’impozamarira kuko ngo yabiciye izina.

Wizkid ashyiriweho impapuro zimuta muri yombi nyuma y’icyumweru kimwe asubitse ibitaramo byose yari afite mu Ukuboza 2016 ndetse n’ibyo yatumiwemo muri Mutarama 2017 kubera ikibazo cy’umunaniro ukabije yagize.

Wizkid yashyiriweho impapuro zisaba ko afungwa

Wizkid ubusanzwe witwa Ayodeji Ibrahim Balogun yari amaze imyaka ibiri yuzuye akora ibitaramo bizenguruka Isi ubutaruhuka, kimwe mu byo yakoze bikomeye harimo icya Mützig Beer Fest cyabereye i Kigali mu ijoro ryo kuwa 27 Kanama 2016.

Yisobanura ku mpamvu zatumye asubika igitaramo yagombaga gukorera mu Mujyi wa Kampala mu byumweru bibiri bishize icyo gihe yaragisubitse avuga ko ‘byaturutse ku bukererwe bw’indege yagombaga kumugeza muri Uganda’.

Wizkid ubwo aheruka kuza i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza