Umushoferi wa Kim Kardashian mu gatsiko gakurikiranyweho kumwibira i Paris

Yanditswe na Dusabimana Aimable
Kuya 10 Mutarama 2017 saa 11:48
Yasuwe :
0 0

Umushoferi watwaraga Kim Kardashian yafashwe na Polisi yo mu Bufaransa ngo ahatwe ibibazo ku bujura bwakorewe nyirabuja ubwo yari ari i Paris mu Ukwakira 2016.

Mu gitondo cyo ku munsi w’ejo ku wa Mbere tariki 9 Mutarama 2017 nibwo Polisi yo mu Mujyi wa Paris yataye muri yombi abantu benshi bakurikiranyweho kugira uruhare mu bujura bwakorewe Kim Kardashian ubwo ahaheruka.

Kuri uyu wa Mbere, Ibiro Ntaramakuru by’Abafaransa, AFP, byari byatangaje ko abafashwe ari abantu 16 gusa uyu mubare waje kwiyongera bagera kuri 17 bakekwaho kugira uruhare muri ubu bujura bwakorewe Kim Kardashian.

Ikinyamakuru Le Monde cyo mu Bufaransa cyavuze ko mu bafashwe harimo umushoferi w’imyaka 27 utwara Limousine yari yarakodeshejwe n’umuryango wa Kim Kardashian mu Mujyi wa Paris.

Mu bafashwe bivugwa ko harimo n’abagore batatu bakoreshejwe kugira ngo bagende bakurikirana Kim Kardashian aho agiye hose.

Umwe mu bafashwe wahawe izina ’Pierre B.’ bikekwa ko ari na we wayoboye umugambi wo kwiba Kim Kardashian, Polisi ivuga ko asanzwe akekwaho kuba mu gatsiko k’amabandi yayogoje u Bufaransa n’u Bubiligi, we na bagenzi be ngo bazwiho no kuba ’ba ruharwa mu gukora amafaranga y’amiganano.’

Mu Ukwakira 2016 nibwo Kim Kardashian yatewe mu cyumba cya hoteli yari acumbitsemo i Paris, yibwe n’abajura babiri bipfutse mu maso ndetse bari biyoberanyije mu mwambaro wa Polisi y’u Bufaransa. Bageze mu cyumba umwe yahise atunga imbuga ku mutwe wa Kim Kardashian, uyu mugore ngo yahise ‘asaba imbabazi avuga ko bamugirira impuhwe ntibamwice kuko afite abana babiri bato’.

Mu cyumba yari afitemo amafaranga yo kwifashisha, impeta ihenze yambitswe n’umugabo we Kanye West ndetse n’indi mirimbo y’agaciro ifite agaciro ka miliyoni esheshatu z’amadolari, ibi byose abajura barabikukumbye barabyandurukana ntibamenyekana.

Umushoferi wa Kim Kardashian ari mu batawe muri yombi
Abantu benshi batawe muri yombi kubera ubujura bwakorewe Kim Kardashian

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza