Umwiryane ni wose mu bavandimwe bagize P Square

Yanditswe na IGIHE
Kuya 27 Nzeri 2017 saa 10:22
Yasuwe :
0 0

Abagize P-Square bagaragaje ko ubumwe bwabo nk’itsinda bujegajega, mu mwaka ushize bacitsemo ibice baza kongera kwiyunga budacyeye kabiri Peter Okoye yasezeye ajya gukora umuziki nk’umuhanzi wigenga.

Peter na Paul Okoye bashinze P-Square, ni impanga zivuka ku mubyeyi umwe. Iri tsinda rimaze imyaka 17 rikora umuziki kuko ryatangiye mu 1999, rifashwa na Konvict Muzik, Universal Music Group. Ryashinze imizi muri Afurika, ryegukanye ibihembo bitabarika.

Mu mwaka wa 2016, umubano wabo nk’itsinda wajemo gishegesha. Ibibazo bijya gutangira, Peter Okoye yavuganye uburakari mu itangazamakuru ko mukuru wabo Jude Okoye [wari manager akanabatunganyiriza indirimbo] ari we uzana umwuka mubi mu itsinda.

Muri Gashyantare 2016, Peter Okoye yirukanye Jude Okoye muri P Square, kuva ubwo itsinda ryahise ricikamo ibice ndetse buri wese atangira gukora umuziki ku giti cye n’ibitaramo batumirwagamo uwagiraga ubwira ni we wajyagayo.

Muri Nyakanga 2016 Peter Okoye ufatwa nk’umuyobozi w’itsinda mu gufata imyanzuro, yanditse kuri Instagram avuga ko P Square yongeye kunga ubumwe ndetse ko ‘bagiye gubukura akazi nk’abavandimwe bonse rimwe bakanafatanya urugendo rw’ubuzima’.

Ibintu byasubiye irudubi, Peter Okoye yongeye kumvikana mu itangazamakuru avuga ko atagikeneye kongera kwitwa umwe mu bagize itsinda rya P Square ndetse yandikiye umunyamategeko wabo Festus Keyamo amumenyesha ko asezeye.

Peter uzwiho ubuhanga mu kubyina yashinje mugenzi we baririmbanaga Paul Okoye ko ‘yasubitse urugendo rw’ibitaramo bagombaga gukorera muri Leta Zunze Ubumwe za Amerika atabanje kumugisha inama’ hakiyongeraho n’ibindi bibazo bagiranye.

Uyu muririmbyi kandi yashinje Paul na Jude Okoye [manager wa P Square] ko nta mbaraga bashyize mu kuzahura iri tsinda nyuma y’ibibazo ryaciyemo mu mwaka wa 2016.

Peter Okoye yanditse kuri Instagram ko ‘ubu atangiye urugendo rushya nk’umuhanzi wigenga’. Yahise abwira abafana be ko agiye gukorera ibitaramo muri Philadephia ari nabyo bibimburira ibindi byinshi azakora ari wenyine.

Yagize ati “Izina ryanjye ni Mr P, uhereye ubu […] hakurikiyeho ibitaramo, ngiye kujya ku rubyiniro.”

Nyuma y’aya magambo ya Peter n’ibindi byose yakusanyirije mu ibaruwa isezera muri P Square, Paul Okoye yamusubije mu buryo busa n’ubwumvikanisha ko ‘ari we wazanye akaduruvayo mu itsinda’.

P Square yongeye gusenyuka
Paul Okoye yababajwe bikomeye n'isenyuka rya P-Square
Nyuma yo kuva muri P Square, Peter ari kwandika amagambo yihenura ku bavandimwe be
No mu mwaka ushize Peter Okoye ni we wari wasezeye muri P Square nyuma aza kugaruka

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza