Urufaya rw’amasasu mu gitaramo cya Radio na Weasel i Kampala

Yanditswe na Munyengabe Murungi Sabin
Kuya 27 Ukuboza 2016 saa 01:08
Yasuwe :
0 0

Igitaramo Moses Nakintije Ssekibogo [Radio] na Duglas Mayanja [Weasel] bagombaga kwitabira mu Mujyi wa Kampala cyasojwe n’urufaya rw’amasasu ubwo abashinzwe umutekano bageragezaga guhosha imyigaragambyo y’abafana.

Radio na Weasel bagize itsinda Good Life ryo muri Uganda bagombaga kuririmba mu gitaramo cyo kwizihiza Noheli cyabereye ahitwa Nateete mu Mujyi wa Kampala ariko birangira batahakandagije ikirenge.

Ibi byateye uburakari abafana ndetse biteza impagarara kugeza ubwo badukiriye inyubako ya hoteli igitaramo cyagombaga kuberamo barayangiza abandi bamenagura ibirahuri n’ibikoresho byoroheje.

Iki gitaramo cyateguwe ahitwa Comprehensive Hotel hasanzwe habera ibirori n’ibitaramo byoroheje i Kampala, cyari cyanatumiwemo abahanzi biganjemo abakizamuka ndetse ni bo bahageze gusa.

Big Eye itangaza ko imyigaragambyo y’abafana yakuruwe no kuba abateguye igitaramo bari baramamaj ko Radio na Weasel bagomba kuzacyitabira ari nacyo cyakuruye benshi bakagura amatike nyamara ngo nta masezerano iri tsinda ryari rifitanye n’aba bantu.

Abahanzi bakizamuka ni bo baririmbye kugeza nyuma ya saa sita z’ijoro, uwari uyoboye igitaramo ngo yakomeza kwizeza abafana ko Radio na Weasel bagiye kuza kuririmba kugeza ubwo byageze mu rukerera batarahagera imyigaragambyo itangira ubwo.

Abashinzwe umutekano barashe urufaya rw’amasasu mu kirere bashakisha uburyo batatanya abafana bari badukiriye Comprehensive Hotel batangiye kuyangiza no kumenagura ibikoresho.

Inshuti za hafiz a Radio na Weasel ngo zabwiye iki kinyamakuru ko nta faranga na rimwe aba baririmbyi bahawe, abateguye igitaramo bananiwe kuzuza ibyo basabwaga kubera ubushobozi buke bityo iri tsinda ntiryagaragara mu gikorwa cyabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza