Uwiyitiriye Justin Bieber ari mu birego 931 birimo gufata abakobwa ku ngufu

Yanditswe na Dusabimana Aimable
Kuya 9 Werurwe 2017 saa 11:58
Yasuwe :
0 0

Umugabo w’imyaka 42 utuye muri Australia yatawe muri yombi akurikiranyweho ibyaha birimo gufata ku ngufu abakobwa yiyita Justin Bieber ku mbuga nkoranyambaga.

Justin Bieber ari mu bahanzi bakomeye ku Isi ndetse bakurikirwa na benshi mu rubyiruko, by’akarusho akaba umunyagikundiro mu bakobwa bakunda umuziki we, ibi bigaragarira mu bitaramo agenda akora aho usanga ababashije kumugeraho bigorana ko bamurekura.

CNN yatangaje ko Polisi yo muri Australia yafashe umugabo uri mu kigero cy’imyaka 42 wiyitiriraga uyu muririmbyi agakoresha n’amafoto ye ku mbuga nkoranyambaga mu kureshya abakobwa barimo n’abakunzi b’ibihangano bye.

Polisi yo muri Australia yashyize ahagaragara urwandiko ruvuga ko ’uyu mugabo yakoreshaga imbuga nkoranyambaga zirimo Facebook na Skype mu kuganiriza abakobwa’ yabaga yagambiriye guhohotera no kubashora mu bikorwa by’ubusambanyi.

Umuyobozi ushinzwe iperereza muri Leta ya Queensland yo muri Australia, Jon Rouse, yagize ati "Igipimo cy’ibi byaha byakozwe n’uyu mugabo mu by’ukuri ni amarorerwa." Yakomeje ati "Iri perereza riragaragaza ko bicyoroshye kuba abakiri bato bakoresha imbuga nkoranyambaga na porogaramu z’itumanaho bashobora kwangirika no gukoreshwa amabi n’abashaka kubahohotera."

Polisi yo muri iki gihugu yavuze ko uyu mugabo utatangajwe amazina yibandaga ku bana bari munsi y’imyaka 16. Mu nzu ye hasanzwe mudasobwa ikubiyemo amabanga agaragaza ko ibi bikorwa byo kuyobya abakiri bato akabashora mu busambanyi yabitangiye kuva mu myaka icumi ishize.

Mu birego akurikiranyweho harimo bitatu byo gufata ku ngufu n’ibindi byiganjemo ibyo kugurisha amashusho y’ubwambure bwabo ku mbuga za internet.

Yasabaga abana b’abakobwa amafoto y’ubwambure akoresheje amazina y’abahanzi bakomeye ku Isi, kuva Justin Bieber yamenyekana yaramwiyitiriye. Mu birego 931 akuriranyweho, harimo 50 by’abakobwa bo muri Leta Zunze Ubumwe za Amerika, 20 bo mu Bwongereza n’abandi batandatu bo muri Australia.

Inzego z’umutekano zavuze ko iperereza rigikomeje, ababyeyi b’abana bakangurirwa kuba maso n’abakunzi ba Justin Bieber basabwa kujya babanza kugira amakenga ku bantu batazi bahurira na bo ku mbuga nkoranyambaga.

Ibikorwa byo guta muri yombi uyu mugabo byahuriranye no kuba Justin Bieber ari mu rugendo rw’ibitaramo muri Australia aho agomba gukora icya nyuma ku itariki 15 Werurwe 2017. Uyu muririmbyi ntaragira icyo abivugaho.

Uyu mugabo yatawe muri yombi mu gihe Justin Bieber ari mu rugendo rw'ibitaramo muri Australia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza