Weinstein, ikirangirire muri sinema yahawe akato kubera abagore bamushinja kubafata ku ngufu

Yanditswe na IGIHE
Kuya 31 Ukwakira 2017 saa 03:36
Yasuwe :
0 0

Ibibazo bikomeje kwisukiranya kuri Harvey Weinstein ushinjwa gufata ku ngufu abagore n’abakobwa akurikiranywe n’inzego zitandukanye bigerekaho ko ihuriro ry’abakora filime ryamuhaye akato by’iteka.

Harvey Weinstein amaze igihe kigera ku kwezi ahanganye n’ibirengo byaturutse mu bagore n’abakobwa batandukanye bamushinja ko yabafashe ku ngufu abandi bakavuga ko yabakoreye ihohotera rishingiye ku gitsina mu buryo butandukanye. Ibirego byose arabihakana ariko benshi bavuga ko bafite gihamya.

Ubu, Harvey Weinstein yahawe akato ndetse yakumiriwe burundu mu ihuriro ry’abahanga mu gutunganya amashusho haba aya filime, ibiganiro by’itangazamakuru ndetse no mu byiciro byose byo gucuruza no gukwirakwiza filime.

Ubuyobozi bw’iri huriro ryitwa Producers Guild of America[PGA] bwatangaje ko Harvey Weinstein akumiriwe kugeza igihe azavira ku Isi. BBC yatangaje ko Umuyobozi wa PGA yavuze ko “ibikorwa by’ubusambanyi no guhohotera abagore bishinjwa Weinstein bidakwiye kwihanganirwa na gato”.

Ibirego n’ubuhamya bushyira Harvey Weinstein mu majwi ko akunda by’ikirenga gusambana no gukorakora abakobwa bwatanzwe mu bihe bitandukanye gusa bwafashe indi ntera mu ntangiriro z’Ukwakira 2017.

Abagore n’abakobwa bazwi muri sinema barimo Lupita Nyong’o n’Umwongerezakazi Lysette Anthony uvuga ko uyu mugabo yamufashe ku ngufu ahayinga mu 1980.

Lupita we yavuze ko ibikubiye mu buhamya bwe byabaye mu 2011 ubwo yari yatumiwe mu rugo rw’uyu mugabo i Connecticut, akamusaba kumukorera ’massage’ mu cyumba cye. Yongeyeho ko yabyanze ariko Weinstein akamutungura akuramo ipantaro ako kanya, niko guhita ahindukira akava aho.

Nyong’o yavuze ko icyamuteye gutinyuka kubivuga nyuma y’imyaka yose ishize ari uko n’abandi bagore bamaze kubitangaho ubuhamya, harimo n’abemeje ko yabafashe ku ngufu.

Uyu mugabo w’imyaka 65 amaze iminsi yeguye ku buyobozi bw’ikigo cya The Weinstein Co ndetse yanajyanywe mu kigo gifasha abasaritswe no gukunda imibonano mpuzabitsina muri Arizona. Yirukanwe mu kigo cya Academy of Motion Picture Arts and Sciences muri iki cyumweru ndetse umugore bashakanye witwa Georgina aramuta.

Weinstein wabaye iciro ry’imigani muri Leta Zunze Ubumwe za Amerika kubera irari ry’igitsina no gufata ku ngufu abagore, ni we washinze ikigo gitunganya amashusho kizwi nka Miramax ari kumwe n’umuvandimwe we Bob mu 1979. Yakoze filime zamenyekanye cyane zirimo iyitwa "The Crying Game," "Pulp Fiction," "The English Patient" ndetse na "Good Will Hunting."

Amaze gushinjwa n’abagore benshi barimo ababicishije mu itangazamakuru byeruye harimo Lena Headey, Eva Green, Minka Kelly, Kate Beckinsale, Lupita Nyong’o n’abandi.

Urugaga yabarizwagamo rwamuhaye akato kugeza igihe azapfira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza