Wizkid yambuwe igihembo cya MTV EMA gihabwa Ali Kiba

Yanditswe na IGIHE
Kuya 17 Gashyantare 2017 saa 01:32
Yasuwe : XX
0

Umuhanzi Ali Kiba yamaze gushyikirizwa igihembo yatsindiye mu bihembo bikomeye bya MTV Europe Music Awards (MTV EMAs), icyo gihe habaye ukwibeshya gukomeye hatangazwa ko Umunya-Nigeria Wizkid yabaye umuhanzi uhiga abandi muri Afurika nyamara atari we watsinze.

Ibihembo bya MTV Europe Music Awards byatangiwe ahitwa Ahoy Rotterdam mu Mujyi wa Rotterdam mu Buholandi kuwa 6 Ugushyingo 2016. Ibirori byo gutanga ibi bihembo byatambukaga kuri Televiziyo mpuzamahanga binakurikiwe na miliyoni zitabarika ku Isi binyuze ku mbuga nkoranyambaga.

Muri ibi birori habaye agashya katazibagirana kuko ngo Wizkid yatangajwe ko yegukanye igihembo cya ‘Best African Act’ nyamara ari icya Ali Kiba wo muri Tanzania.

Icyo gihe habaye ihangana rikomeye hagati y’abafana ba Ali Kiba n’aba Wizkid bamwe bavugaga ko bashimishijwe n’intsinzi y’umuhanzi wabo abandi bagasakaza inyandiko zamagana uyu Munyanijeriya ndetse bakagaragaza ko igihembo yahawe cyatanzwe mu manyanga ari nacyo cyatumye hasubirwamo ibarura ry’amajwi basanga koko harabayemo akarengane.

Ubuyobozi bwa MTV Europe Music Awards bwari bumaze iminsi bwisubije iki gihembo cyari cyoherejwe muri Nigeria ubu cyashyikirijwe Ali Kiba mu muhango wabereye muri Afurika y’Epfo ari naho uyu muhanzi amaze iminsi.

Ali Kiba yanditse kuri Instagram ashimira abantu bose bamufashije mu kumvikanisha akarengane ke, yagize ati ‘Ndashaka gushimira Imana ku migisha ikomeje kumpundagazaho, ndashimira umuryango wanjye, itsinda rireberera inyungu zanjye n’abafana. Ndabakunda bitagira urugero. MTV EMA Best African Act, King Kiba.”

Iki gihembo cyari gihanganiwe n’abahanzi batanu muri Afurika Ali Kiba (Tanzania), Black Coffee (Afurika y’Epfo), Cassper Nyovest (Afurika y’Epfo),Olamide (Nigeria) na Wizkid (Nigeria).

Uyu muhanzi wiyita ‘Star Boy’ ni we wari watangajwe ko yatsinze mu cyiciro cya Best African Act gusa byamenyekanye ko habayeho ukwibeshya. Wizkid yatwaye ikindi gihembo gikomeye cya Worldwide Act.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza