Wizkid yasobanuye uko yarezwe na nyina w’umukirisitu naho se ari umuyisilamu

Yanditswe na Dusabimana Aimable
Kuya 18 Mata 2017 saa 07:54
Yasuwe :
0 0

Umuririmbyi Wizkid wo muri Nigeria yatanze ubuhamya bujyanye n’uko yakuriye mu muryango w’abakobwa barindwi ndetse n’uburyo yarezwe n’ababyeyi bafite imyemerere itandukanye mu by’idini ariko ntihagire umuhatira kugira iryo ajyamo mu yo basengamo.

Wizkid ubusanzwe witwa Ayodeji Ibrahim Balogun aharawe cyane muri iki gihe mu ndirimbo ’Come Closer’ yakoranye na Drake n’izindi zakunzwe na benshi nka ’One Dance’ yahuriyemo n’uyu muraperi, Ojuelegba, Final (Baba Nla), Show You the Money, In My Bed, Bad ft Tiwa Savage, Mamacita yaririmbanye na Tinie Tempah n’izindi nyinshi.

Mu kiganiro uyu muhanzi ufite izina rikomeye muri Afurika yagiranye na Televiziyo y’Abongereza yitwa Channel 4 News, yavuze birambuye ku rugendo rwe muri muzika n’uburyo arangamiye guteza imbere umuco wa Afurika abinyujije mu bihangano akora ndetse anagaruka ku buzima bwite bwihariye n’uko yabyirutse.

Uyu muhanzi yatanze ubuhamya bw’uburyo yakuriye mu muryango w’ababyeyi batumva kimwe ibijyanye n’inzira igana ku Mana ariko avuga ko nubwo byari byifashe bityo atigeze abigiraho impungenge kuko nta n’umwe muri bo wamurebye igitsure ku bwo kutagendera mu murongo we.

Ati "Ntabwo nabihindura, kuko ni ibyangize uwo ndi we kugeza magingo aya, kuba mu nzu irimo Mama w’Umukirisitu na Data usengera muri Islam kandi ntihabure impaka zijyanye n’idini buri munsi cyangwa izijyanye n’urubyaro rukwiye."

Yakomeje avuga ko mu muryango we avukana n’abakobwa barindwi akaba ari umuhungu rukumbi muri bo.

Yongeyeho ati "Data yarambwiraga ati kora icyo ushaka, niba ushaka kuba umuyisilamu ntacyo bitwaye, ujye ku rusengero cyangwa mu musigiti, uzakore ibyo ushaka […] Icyo numva neza ni uko urukundo ruza ku isonga mu byatumye bagumana mu gihe kirekire. Ababyeyi banjye basezeranye kuva mu gihe kinini gishize, mushiki wanjye mukuru ubu afite imyaka 38, ababyeyi banjye babanye mu bihe byiza no mu makuba."

"Imibereho mu muryango wacu yaramfashije cyane mu buzima, byatumye nkunda, kandi nkunda ababyeyi banjye kugeza ku rupfu. Ni byose kuri njye."

Uyu muhanzi yakomeje avuga ko kimwe mu byagoranye mu muryango we ari ukwiyumvisha inyungu yari buzakure mu muziki cyane ko mu gihugu cye ari umuhanzi wa mbere ukiri muto wari ugeze ku rwego rukomeye nk’urwo umuziki wahise umugezaho mu mizo ya mbere.

Wizkid asobanura uburyo yarerewe mu muryango udahuje imyemerere

Ayodeji Ibrahim Balogun yavutse ku wa 16 Nyakanga 1990. Yatangiye umuziki afite imyaka 11 y’amavuko gusa yamamaye binyuze mu ndirimbo "Holla at Your Boy" yakoreye muri Empire Mates Entertainment ya Banky W. Yasohoye iyi ndirimbo mu mwaka wa 2010, iyi yaje gusohoka kuri album yise Superstar yagiye hanze muri 2011.

Yagukanye ibihembo bikomeye birimo BET Award, MOBO Award,
The Headies Awards(inshuro eshanu), Channel O Music Video Awards (inshuro ebyiri), Nigeria Entertainment Awards (inshuro esheshatu), Ghana Music Awards (inshuro ebyiri) n’ibindi.

Wizkid ni umwe mu bahanzi bamaze kubaka izina rikomeye muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza