Abazavamo Nyampinga w’u Rwanda bizihirije Saint Valentin mu mwiherero (Amafoto)

Yanditswe na Dusabimana Aimable
Kuya 15 Gashyantare 2018 saa 01:55
Yasuwe :
0 0

Abakobwa bazatoranywamo Nyampinga w’u Rwanda 2018 bamaze iminsi mu mwiherero uri kubera mu Mujyi wa Nyamata, bahabwa imyitozo ibafasha kunogereza ubwiza bwabo ndetse n’amasomo akubiyemo ubumenyi mu byiciro bitandukanye.

Umunsi w’abakundanye mu mwiherero bawizihije basubiramo imwe myitozo yo kunoza ingendo, bose hamwe basangiye ifunguro ry’umugoroba bagenewe na Golden Tulip yabakiriye ndetse bafatanya gukata umutsima wizihiza Saint Valentin nubwo abafite abakunzi muri bo bari kure yabo.

Abakobwa bafite impano haba mu kuririmba no gusubiramo indirimbo z’urukundo bazigaragaje muri ibi birori bije bikurikira ibindi bikorwa bitandukanye bamazemo iminsi mu mwiherero.

Mu minsi bamaze mu mwiherero, bamaze gukora ibikorwa bitandukanye bibategura kuba ba Nyampinga babereye u Rwanda, baganirijwe n’abantu batandukanye babaha impanuro.

Mu banyacyubahiro basuye abakobwa bari mu mwiherero harimo Senateri Tito Rutaremara wabaganirije ku ndangagaciro z’Abanyarwanda ndetse na Lt. Col. Kabayiza Sostene wabigishije uruhare bagira mu guharanira iterambere ry’igihugu yibanda cyane ku ruhare rukomeye abagore n’abakobwa muri rusange bagize mu rugamba rwo kubohora u Rwanda n’ingaruka nziza ibyo bakoze byagiriye igihugu.

Abakobwa bahataniye ikamba rya Nyampinga w’u Rwanda basezeye ku babyeyi ku wa 9 Gashyantare 2018 bajyanwa mu mwiherero (Boot Camp) ubera kuri Golden Tulip [La Palisse] i Nyamata, aho bazamara ibyumweru bibiri mu bikorwa bitandukanye.

Nyuma y’uwo mwiherero bazungukiramo amasomo atandukanye, bazawuvamo haba ibirori nyamukuru bizasiga hamenyekanye Nyampinga mushya w’u Rwanda, uzatorerwa muri Kigali Convention Centre ku ya 24 Gashyantare 2018.

Mu bihembo Nyampinga azahabwa harimo imodoka nshya ya Suzuki Baleno ya miliyoni 18 Frw n’umushahara w’ibihumbi 800 by’amafaranga y’u Rwanda ku kwezi bizatangwa na Cogebanque, kumwishyurira salon akoreshamo imisatsi umwaka, kumwambika igihe cyose agiye mu marushanwa, kumwishyurira internet y’umwaka n’ibindi.

Mu bizashingirwaho batoranya Nyampinga, harebwa uburanga (ku manota 30%), ubuhanga bwe (amanota 40%) ndetse n’uko yiyerekana (amanota 30%) byose bikagira igiteranyo cy’amanota ijana. Nyampinga kandi aba ahiga abandi mu bumenyi no kumenya gusubiza ibibazo abazwa, iyi ngingo niyo ihabwa agaciro cyane kurusha izindi.

Abakobwa bazavamo Nyampinga w'u Rwanda bose uko ari 20 bizihirije Saint Valentin mu mwiherero
Ahabereye ibi birori hari umuteguro ujyanye na Saint Valentin
Basubiyemo ingendo n'imyiyerekano bamaze iminsi batozwa mu mwiherero
Bakoze imyiyerekano batojwe
Bari bafite akanyamuneza nubwo abafite abakunzi bari kure yabo
Buri mukobwa yari afite akarabo gatukura
Aba bakobwa basangiye ifunguro ry'umugoroba wa Saint Valentin
Bafatanyije gukata umutsima wanditseho amagambo yizihiza Saint Valentin
Golden Tulip yakiriye aba bakobwa yabageneye impano
Nyampinga w'u Rwanda mu bihembo azahabwa harimo imodoka nshya ya Suzuki Baleno ya miliyoni 18 Frw n’umushahara w’ibihumbi 800 Frw ku kwezi bizatangwa na Cogebanque
Abakobwa 20 bazavamo Nyampinga w'u Rwanda bari gukorera umwiherero i Nyamata

Amafoto: Miss Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza